KUCHING: Presiden Gerempung Veteran Soldadu Kor Renjer (PVTKR) Leftenan Kolonel (B) Mohd. Melintang bin Abdullah entara penerima pangkat basa Johan Bintang Kenyalang (JBK) ari Tuai Pemegai Menua (TYT) Nengeri Sarawak, Tun Pehin Sri Abdul Taib Mahmud ba Balai Besai, Astana Nengeri Sarawak, Petra Jaya, kemari.
Melintang asal ari menua Selanjan Sebemban di Sri Aman ngembuan pelajar tikas Master ba bidang Pengatur Dagang Korporat ari Universiti Malaysia Sarawak (Unimas) taun 2004.
Iya berengkah dipadu gawa soldadu ba Kor Rejimen Renjer Diraja kena 21 Disember 1978 pengudah nembuka latih kadet ba Maktab Tentera Diraja Sungai Besi Kuala Lumpur.
Udah nya, iya kala dianjung gawa begulai enggau Serakup Bansa Dunya (PBB) nyadi pematau soldadu ba United Nations Observer Mission di Liberia (UNOMIL) 1996, Pematau Soldadu ba United Nations Mission di Ethiopia Eritrea (UNMEE) 2006, Pematau Soldadu ba United Nation Mission di Afrika.
Nangka ke nya, iya mega gawa ba Union Mission di Dafur (UNAMID) 2008 enggau diinjau PBB gawa nyadi Pegawai Penyambung Soldadu PBB ke African Union (Kesatuan Africa) berengkah taun 2009 nyentuk 2012.
Melintang pinchin gawa nyadi soldadu darat Malaysia (ATM) kena 21 Disember 2014 pengudah 36 bejalaika tanggungpengawa ke chukup besai dalam bidang soldadu.
Diatu iya, mengkang regas sereta gawa nyadi Direktor Unit Pengelikun ba Unimas.
Sama enggau Melintang nerima JBK kemari iya nya Kaunselor Suhaili bin Abang Abu Samy.
Kelimpah ari JBK, TYT mega bisi nyuaka pangkat basa Johan Perkhidmatan Cemerlang (JPC) ngagai dua penerima, Midul Kerani Perintah, Pinggat Perkhidmatan Cemerlang (Emas) (PPC) disua ngagai semilan iku penerima.
Udah nya, penerima pangkat basa Pegawai Bintang Sarawak (PBS) bisi enam iku enggau Pegawai Bintang Kenyalang (PBK) bela enam iku.
