KUCHING: Sapit Tuai Nembiak PBB ke mega ex-Adun Tupong Fazzrudin Abdul Rahman madah, PRN12 mesti diatur dikena mulaika baru mandat rayat milih perintah nengeri taja Covid-19 agi ngerekai.
“Idup mesti diteruska, semua sektor baka pelajar, lumba, rama enggau ke bukai patut dibuka baru. Pia mega enggau pengawa bepilih besai mesti diatur laban timpuh Dun Sarawak udah abis.
“Kitai enda nemu kemaya penyakit tu punas, nyangka tengan taun baru taun 2023. Reti nya idup mesti diteruska ungkup pemansang Sarawak dudi hari.
“Udah nya, sebarang aja ke digaga kitai, endang tanggungpengawa diri nentuka utai ke digaga nya likun dikereja,” ku iya madah ngagai Suara Sarawak.
Nya alai, ku iya dikena nentuka PRN12 bejalai enggau likun, Opis Menteri Pengerai Malaysia (KKM), Komiti Pengawa Bepilih Besai (SPR) sereta parti-parti politik ke ngambi bagi mesti bejalaika tanggungpengawa berat nentuka SOP ti engkeman.
