Produk rutan digaga Mohd Amin chukup tan sereta bekualiti

KUCHING: Produk kraf jari ti digaga Mohd Amin Abdullah, 63 taun ari rutan ulih rembus ngagai makit menua luar baka Brunei, Singapura enggau Thailand laban tan sereta bekualiti.

Amin asal ari Kampung Abit, Balai Ringin madahka kraf jari iya digaga ari rutan ti dianyam nyadi mayuh bansa bakul bungai, bakul mayau, bakul ngengkah gari, bakul payung enggau ke bukai.

“Aku berengkah nganyam bakul tu kenyau taun 2003 ngena rutan pulur ti semina diudar ari Selangor.

“Kelimpah ari rutan pulur, aku mega ngaga bakul ari wi ti digiga ba menua aku empu,” ku iya lebuh dirandau Suara Sarawak apin lama.

Ku Amin, produk pengelandik jari iya tan sereta bekualiti tinggi laban nitihka kualiti ti dipatau Kraf Jari Malaysia Pampang Sarawak.

“Nya kebuah, produk pengelandik jari aku ulih rembus ngagai menua luar baka Brunei, Singapura enggau Thailand laban ditukuka bekualiti tinggi ari Kraf Jari Malaysia Pampang Sarawak.

“Entara pemar diasaika aku lebuh produk ari menua luar baka produk ari menua Indonesia tama kitu nengah jalai chit.

“Tambah mega, dalam kandang dua taun ke udah aku napi pemar ngelakuka produk tu ketegal pengerekai penyakit Covid-19,” ku iya.

Iya mega ngarapka produk ti digaga iya ari rutan terus nerima peminta tinggi ari mensia mayuh di Malaysia.

“Aku selalu mesan mensia mayuh ngambika terus meli barang ‘Buatan Malaysia’ baka kraf jari tu.

“Kelimpah bulih barang ti bekualiti, sida mega ulih mantu pedagang kraf jari baka kami nambahka penatai pemisi,” ku iya.

Ku Amin, iya mega kala ngajar nembiak nganyam bakul ngambika pengelandik nya enda lenyau jemah sereta terus dikemeranka.

“Tang enda semua sida puh ngayam bakul baka aku, sida rindu agi meli produk ti udah tembu ari nganyam kediri.

“Aku ngarapka pengawa ngayam rutan tu enda lenyau laban pengawa tu tau meri penguntung sereta tau digaga nyadi dagang ba makit luar,” ku iya.

MANAH…Entara produk kraf jari ti digaga Mohd Amin.

 

MANAH…Entara produk kraf jari ti digaga Mohd Amin.

Suara Sarawak