MUKAH: Bemacham pupu bansa ngambi bagi ba Program Bejalai Beraban Niti Daun serimbai Pengerami Ngiling Bidai siti chunto pemadu manah ti mandangka pengelantang enggau penyerakup pupu bansa.
Sapit Menteri Ekonomi ti mega Kaban Parlimen Mukah, Datuk Hanifah Hajar Taib madah, semua pupu bansa begulai ngintu pengerami nya enggau semangat penyerakup.
“Taja pen keterubah diatur ba Mukah tang semangat penyerakup enggau kerejasama ulih dipeda nengah bemacham pupu bansa di Mukah ngambi bagi ba program tu.
“Ti bendar, semangat enggau pemereti ati baka tu siti pekara manah ti dikembuan rayat Sarawak ti patut dichunto,” ku iya.
Hanifah mansutka jaku nya rambau bejadi Pengerami Ngiling Bidai Mukah 2024 ba Palan Lapang Pehin Setia Raja ditu, sehari tu.
Terang iya, Pengerami Ngiling Bidai nya bepelasarka konsep ‘Bejalai Beraban Main Asal’ lalu ari nya kitai ulih meda penyelai enggau bemacham budaya ti dikembuan rayat Sarawak.
“Sehari tu, kitai ulih meda pengawa bekunsi budaya baka Program Miring Niti Daun, Pengawa Bejalai Beraban Niti Daun ti disempulang pengawa begendang rayah, ngajat enggau mantai seni kuntau.
“Tu mandangka seni adat enggau main asal semampai dijaga nyentuk sehari tu lalu aku ngarap pekara tu ulih ditampung rebak dudi,” ku iya.
Iya mega ngarap pengerami nya mujur nyapai juluk sereta ulih narak penyerakup enggau ngedut pemanah kaul.
