KUCHING: Mensia mayuh diperansang ngambi bagi ba Program Belanda Baton Lumba Orang Bengal Malaysia (SOPMA) 2025 dikena meri sukung ngagai komuniti nya di menua tu.
Menteri Pengangkut, Datuk Seri Lee Kim Shin madah ke iya nyukung inisiatif nya ti meri pemaik ngagai komuniti bengal nengah lumba enggau main.
“Aku seruran muji penetap enggau pengeliat ati bala atlit bengal menua kitai.
“Semangat sida napi pemar sereta besemekih ba renggat ti tinggi endang patut dipuji.
“Aku bela meri sukung ngagai Gerempung Orang Bengal Sarawak nengah pekara lumba enggau main di Sarawak kenyau ari aku nyadi Menteri Muda Nembiak, Lumba enggau Main suba,” ku iya.
Kim Shin bejaku munyi nya rambau nerima penemuai basa Komiti Pengatur Program Belanda Baton SOPMA 2025 di Begunan Baitulmakmur ll ditu, kemari.
Ku iya, program belanda nya ila deka berengkah diatur di Miri kena 4 Mei tu lalu dientudi ke Bintulu (18 Mei), Sibu (25 Mei) sereta deka beujung di Kuching (8 June).
Program Belanda Baton SOPMA 2025 masang juluk deka ngempuruka 4,500 penyereta ba empat bagi menua di Sarawak iya nya Miri, Bintulu, Sibu enggau Kuching.
Chairman Pengatur, Victor Hii Lik Nguong madah, tuju sida ngatur program nya dikena ngumpul belanja ungkup SOPMA XXII Sarawak 2025 nengah aktiviti lumba enggau main ninting taun ke bukai.
