Program Kasih Ramadan SDO ngemai pengelantang

KOTA SAMARAHAN: Opis Pemansang Perintah Besai Nengeri Sarawak (SDO) ngatur Program Singgah Sahur ngelingi Kuching ninting bulan Ramadan.

Direktor Pemansang Nengeri Zaki Mahyuddin madah, program tu bejalai nyadung pemakai lalu berengkah dipejalai dalam taun 2010.

“Piak kami deka nyadung pemakai ngelingi Kuching dalam Program Singgah Sahur kenyau ari taun 2010 ninting Bulan Ramadan nyentuk diatu.

“Kami nyadung pemakai pemakai ngagai orang kampar, sida ke gawa malam baka jaga, raban polis sereta bala soldadu,” ku iya.

Iya mansutka jaku nya lebuh dirandau ba Program Kasih Ramadan di Kampung Baru sehari tu.

SIRU… Zaki Mahyuddin (berdiri lima kanan) nyuaka bantu ngagai penerima di Kampung Baru tadi.

Iya nambah, sida nyadung pemakai berengkah ari pukul 11.00 malam nyentuk jam sahur.

“Pia mega, taun nyin kemari kami ngelawa endur nembiak ke benung belajar bemalam baka rumah kedai enggau ke bukai nyadung pemakai,” ku iya.

Berindik ari nya, iya meri terima kasih ngagai piak Opis Pelilih enggau Residen.

“Aku meri terima kasih ngagai Opis Pelilih enggau Residen laban udah meri rintai raban seranta ngagai SDO dikena rejista sida dalam e-Kasih.

“Tu ngemuntangka pengawa kami beratika bantu ke patut diberi ba renggat pelilih menua enggau nengeri,” ku iya nerang.

Raban SDO kemari nampung pengawa sida nyadung pemakai ngagai Kampung Baru mungkur lima Ketuai Isi Bilik (KIR) ba atur Program Kasih Ramadan.

Tu endang kerejasama SDO enggau Bank Muamalat Malaysia Berhad dikena ngelempungka tating belanja bala penerima maya Bulan Ramadan tu.

Sama datai Sapit Direktor Pemansang Nengeri Hamdiah Ismail, Menijar Pampang Bank Muamalat Malaysia Berhad Hawina Hipni sereta bala pengari bukai.

NYAUP… Zaki Mahyuddin berandau enggau penerima bantu pasal pengerai indai iya ke mati tubuh sepiak.

Suara Sarawak