Program Randau Solidariti Komuniti 2020 menalan nerang polisi baru

MIRI: Program Randau Solidariti Komuniti 2020 endang menalan engkeman dikena nerangka polisi pemadu baru Perintah Sarawak ngagai rayat

Kaban Kunsil Nengeri (Adun) Lambir Ripin Lamat madah program tu chukup manah ngagai semua renggat komuniti di sitak tu.

“Ba penemu aku, program tu ulih dikena ejensi perintah nerangka ngagai rayat mayuh bekaul enggau polisi pemadu baru perintah Sarawak,” ku iya.

Ripin madah munyi nya rambau bejadika Program Randau Solidariti Komuniti 2020 ke diatur ba Kampung Tunku Abdul Rahman ditu kena Hari Enam tu tadi.

Nangkan ke nya, Ripin bisi ngelalau mensia mayuh patut nelebaka diri enggau pekara ke nyadi ba serata dunya jam ke diatu.

“Kitai ke nyadi rayat ari mayuh pupu bansa patut neleba diri enggau pemansang berita ke bisi nyadi ba serata dunya nyengkaum bekaul enggau inovasyen sereta teknologi,” ku iya.

Ku iya mega, kelimpah Kampung Tunku Abdul Rahman, program ke sebaka mega kala diatur ba sekeda genturung pendiau di Lambir.

Suara Sarawak