KUCHING: Program ‘What About Kuching’ (Wak) entara program besai dalam kelinder aktiviti ninting taun Sarawak deka matak mayuh agi pemain seni entarabansa.
Menteri Dagang Temuai, Industri Kreatif enggau Seni Pemerindang, Datuk Seri Abdul karim Rahman Hamzah madah, mayuh agi pengemeran seni entarabansa udah datai ngagai menua tu beperindang ba pengerami nya.
“Wak tu endang udah nyadi pengerami besai dipasuk dalam kalinder aktiviti kami ungkup Opis Menteri Dagang Temuai, Industri Kreatif enggau Seni Pemerindang.
“Aku temegah enggau deka terus nyukung Wak nyadi pemelanja besai sekali agi taun tu sereta taun dudi.
“Pengudah pengerami tu majak ngerembai, kitai deka beratika mayuh aktiviti entarabansa dikerembai.
“Tu deka nyendiaka peluang besai ungkup raban kreatif menua merindang begulai enggau artis entarabansa sereta ngangkatka standard Sarawak dudi hari,” ku Karim.
Karim mansutka jaku nya lebuh ngelancharka Wak, kilah ensanus.
Nambahka nya ku iya, peluang besai di Wak deka nentuka Sarawak diangkat sereta ngembuan mayuh agi peluang.
“Enda lama agi kitai ulih temegah ati pengudah mayuh agi aktiviti tikas entarabansa diangkat dalam industri seni enggau kreatif.
“Tambah mega, Kuching udah diaku nyadi Mengeri Kraf ari Kaunsil Kraf Dunya lalu Unesco ngaku Kuching nyadi Mengeri Kreatif Gastronomi,” ku iya.
Ku iya, Wak ti diatur sepemanjai bulan Oktober kenyau ari taun 2017 udah nyendiaka bemacham pemerindang kreatif pasal pengeraja pesaka Sarawak, pemerindang, adat enggau budaya nyengkaum pemakai asal ke majak ngerembai.
“WAK udah natak mayuh pengusung. Ba taun 2017, pengerami tu udah nerima lebih 70,000 iku pengusung enggau ba taun 2019 nerima lebih 260,000 iku pengusung.
” Aktiviti ke udah diatur mega nambah beberapa taun ari 75 aktiviti ba taun 2017 nambah ngagai 121 aktiviti ba taun 2019,”ku iya.
Ba lansa bukai, Karim madahka Sarawak nerima 439,150 iku pengusung nyentuk bulan Mei tu tadi.
” Sarawak nagit 1.2 juta iku pengusung taun tu ke deka nambahka penatai pemisi urung RM3.2 bilion dalam resit dagang temuai lalu naka diatu, kitai udah nerima 439,150 pengusung nyentuk bulan Mei,”
ku iya.
