SIMUNJAN: Program Nyambung Karan Dibaruh Peminta Laun Enggau Tambah (Alaf) deka disambung nyentuk taun 2025 sereta meri pemaik ngagai peranak ba sitak Dun simunjan.
Projek tu benung dipejalaika ba selampur nengeri dikena nentuka semua ruang bilik ba sarawak bela ngasaika bekal kuasa karan.
Adun Simunjan Awla Dris madah, projek Alaf endang sebengkah projek ke ulih mutarka penanggul rumah ke bedau ngasaika bekal karan ba sitak nya.
Ku iya, naka tu bisi 253 buah rumah bedau disambung bekal karan lalu sida ba sitak udah kelalu lama nganti projek nya.
Maya taklimat pasal pengawa nyambung bekal karan begulai enggau Tuai Komuniti Enggau Tuai Rumah (KMKK) Dun Simunjan kena Hari Enam tu tadi.
Iya ngelalau peranak Simunjan terus meri kerejasama ngagai KMKK maya begunaka penerang ke bekaul ngambika projek nya ulih lengkas dikemujur.-Ukas
