PADAWAN: Komuniti Tawang Baa ditu ngerami pemujur projek bumai padi nengah Program Ngetau Padi Komuniti. Inisiatif asil kerejasama entara Sarawak Skills enggau Yayasan Hasanah nya dikena negap komuniti menua pesisir nengah aktiviti betanam betupi meruan seraya nyukung pengawa negap pengelikun bekal pemakai ba nengeri tu.
Kaban Parlimen Puncak Borneo, Datuk Willie Mongin madah, projek nya meri perati ngagai pengawa bumai padi enggau pelin pemansang meruan ti mega nyerangkung ngemansang inisiatif eko dagang temuai.
Ku iya, nengah inisiatif tu, empat nembiak ari Tawang Baa diberi peluang ngulu latih formal pengawa nanam padi ba Kaunsil Pemansang Betanam Betupi Muda (MADA) Kedah.
“Pengudah tembu latih, sida deka pulai ngagai komuniti lalu nyadi pengajar ngambi ngembing sereta bekunsi penemu ngagai peranak lokal ba pengawa ngintu enggau ngerembai program bumai padi,” ku iya.
Iya meri terima kasih ngagai Sarawak Skills enggau Yayasan Hasanah kelai pengeran nyukung pemansang kapasiti betanam betupi ba komuniti.
Willie mega muji projek nya laban ngemujur pengawa negap pemansang kapasiti industri padi ba Sarawak seraya madah ke empat nembiak ari komuniti Tawang Baa udah dipilih ngulu Program Sijil Kemahiran Malaysia Tahap 3 pengelama dua taun di MADA.
Ku iya baru, inisiatif baka nya beguna amat nentuka pemeruan projek betanam betupi bepelasarka komuniti lalu negap rebak biak ngena pengelandik ti berega.
“Program baka tu ukai semina nyaup nambah pemansut pemakai tang mega ngerandang peluang ngagai komuniti menua pesisir nyendia penatai pemisi tambah.
“Tu mega negap nembiak ngena pengelandik ti ulih meri pemaik ngagai komuniti sida ba timpuh panjai,” ku Willie.
Nangkan nya, Direktor Eksekutif Sarawak Skills, Hallman Sabri nerang ke program nya ngayan pengeran organisasyen nya bejalaika inisiatif bepelasarka komuniti ti ulih meri empas besai enggau meruan ngagai komuniti.
“Nengah kerejasama enggau Yayasan Hasanah sereta komuniti Tawang Baa, kami ngarap tu ulih ngemanah pengidup ba menua pesisir seraya nyamin pengelikun bekal pemakai,” terang iya.
Hallman meri terima kasih ngagai Willie ti meruan meri sukung sereta penatai iya ba program nya seraya madah ke sukung baka nya meri peransang ngagai organisasyen enggau komuniti lokal.
Iya mega mega terima kasih ngagai sekeda ejensi perintah ti nyukung program nya nyengkaum Opis Menteri Industri Pemakai, Komoditi enggau Pemansang Kandang Menua Sarawak (M-FICORD), Opis Menteri Pelajar, Inovasyen enggau Pemansang Penau (MEITD) sereta Opis Betanam Betupi.
Ku Hallman baru, sukung ari ejensi nya beguna endar dikena ngemuntang chara bejalaika inisiatif bumai padi sereta ngemujur aktiviti betanam betupi bepelasarka komuniti dia.
Program nya mega mandangka pengeransing komuniti Tawang Baa ti bela ngambi bagi ba pemujur projek nya.
Nengah inisiatif baka nya, Sarawak Skills enggau Yayasan Hasanah ngarap ulih meransang mayuh agi komuniti menua pesisir nyerungkai pengawa betanam betupi nyadi pun pengidup lalu nyukung inisiatif besai agi negap pengelikun bekal pemakai ba Sarawak.
