Projek melakin Jalai Pujut 7 ditampung baru

MIRI: Pengawa melakin baru Jalai Pujut 7 enggau Jalai Besai Lutong ti deka tembu enda lama agi deka meri pengelantang ngagai mensia mayuh.

Menteri Perengka Pengangkut Datuk Lee Kim Shin madah projek tu diatu tejanggal mimit laban enda chukup perengka ti patut diimport ari kuching.

“Diatu kebendar projek melakin baru Jalai Pujut 7 Miri urung 460 meter pemanjai tu benung digaga ngena ungkus belanja RM500,000.

“Projek tu deka ditampung berengkah minggu baru lalu dipelaba tembu dalam timpuh tiga hari.

Iya ke mega Adun Senadin mansutka pekara nya pengudah ngabas
Projek Melakin Jalai Pujut 7 Miri kena Hari Enam tu tadi.

Nangkan ke nya, Kim Shin madah projek ke sebaka mega benung digaga iya nya Jalai Besai Lutong ti rembus ke Jalai Pujut 7.

Nerang silik, Kim Shin madah projek tu mungkur agih belanja 500,000 lalu penyampau belanja ungkup dua bengkah projek tu manggai RM1 juta.

Nya alai, mensia mayuh ke diau ba sitak Zon Utara Miri dikearap besabar sekumbang projek tu digaga. Enti udah tembu ila, jalai ke menyana tu iya deka meri pengelantang sereta nyamin pengelikun semua penguna jalai raya.