SIBU: Rumah Bonnie Abong di Ulu Pasai Siong deka terang enda lama agi enti Projek Skim Elektrik Menua Pesisir (RES) udah tembu.

Chairman Parti Sa’ati Rayat Sarawak (SUPP) Pampang Dudong, Kaunsilor Wong Ching Yong madahka, raban kunteriktor ari Sarawak Energy Berhad (SEB) benung kiruh nyambung tali karan RES ngagai genap pintu rumah panjai nya.

“Nitihka penerang ari raban kunteriktor, Rumah Bonnie tu deka nerima bekal elektrik sebedau Hari Krismas pengudah projek nya tembu.

“Tu mih pemansang ti lama dianti peranak rumah panjai nerima bekal elektrik ngambi meri penampak ngagai rumah panjai sida,” ku Wong.

Wong mansutka jaku nya lebuh ngatur pejalai nemuai ngagai Rumah Bonnie Abong di Ulu Pasai Siong, kilah ensanus.

Ku Sapit Chairman Kaunsil Pelilih Menua Pesisir Sibu (MDLBS), sebedau tu tiang karan Res nya udah didiri.

Terang iya, Projek Res tu dikemendar ba bulan June tu tadi pengudah SUPP Pampang Dudong nganjung peminta ngagai Presiden SUPP ti mega Menteri Kaunsil Kandang Menua enggau Pengawa Berumah, Dato Sri Dr Sim Kui Hian ba bulan Januari tu tadi.

“Sebedau tu, kami bisi nerima peminta ari Rumah Bonnie ti madahka diri apin disikap bekaul elektrik.

“Udah nya, kami nganjung peminta sida serumah ngagai Dr Sim sereta nganjung baru peminta nya terus ngagai Opis Menteri Utiliti.

“Opis Menteri Utiliti nengah Sekretari Mendam iya, Dato Ir Alice Jawan udah nya ngemendarka peminta tu ba bulan June tu tadi nengah Projek RES,” ku Wong nerang silik pasal juluk peranak Rumah Bonnie diatu nyadi nyata.