KUCHING: Raban indu diaku nyadi orang ti chukup besai reti ba pengidup genap iku orang laban sida ngesan pangku pengawa besai nempa institusyen ruang bilik ti tegap enggau komuniti ti lantang.
Tuai Pemegai Menua (TYT) Sarawak, Tun Pehin Sri Dr Wan Junaidi Tuanku Jaafar madah, raban indu ngesan pangku pengawa besai nyadi indai, bini, tuai ba ruang bilik enggau komuniti ti nyungkak ngagai penegap institusyen ruang bilik.
Iya madah, nengah pengidup iya empu, iya ngasai ke peneleba ti ulih mai iya mereti ke ati enggau runding raban indu.
“Ba pengidup aku empu, peneleba bepun ari embing siku indai lalu dientudi ke bini ti chukup bedisiplin enggau jelan aja ti ngadaka tiga iku anak indu.
“Nengah peneleba nya, aku ulih mereti ke ati sereta runding raban indu enggau dalam agi.
“Diatu, nengah penatai bini aku, Toh Puan Datuk Patinggi Fauziah Mohd Sanusi ti chukup siru, sayau enggau taluk nyadi pun pengering aku sereta meri inspirasyen ngagai aku,” ku iya.
Tun Wan Junaidi bejaku munyi nya serimbai Hari Indu Sedunya 2026 ditu, tadi.
Nangkan nya, iya enggau bini meri Selamat Hari Indu Sedunya ngagai semua indu di selampur Malaysia kelebih agi di Sarawak.
“Ngarap pengerami ngintu Hari Indu Sedunya tu mai semua kitai terus ngaku jasa enggau pengeransing raban indu.
“Kelimpah nentuka sida seruran dibasa enggau ditegap ba pengawa nempa kuing dudi hari ti manah agi ungkup nengeri enggau menua,” ku iya.
