BINTANGOR: Perintah Sarawak nengah Ejensi Pemansang Delta Rajang (RADDA) udah ngemendar tiga projek besai ungkup pemaik timpuh peranak peranak ba sitak Meradong.
Kaban Kunsil Nengeri (ADUN) Meradong, Datuk Ding Kuong Hiing madah, ketetiga projek nya baka projek nyeleti tebing Sungai Bintangor ti beungkus RM35 juta, nyeleti Taman Rekreasyen Bintangor (RM4 juta) enggau ngaga Pasar Sentral dua ringkat ti baru (RM18 juta).
Iya madah, projek nyeleti tebing Sungai Bintangor disadang dipejalai taun tu ukai semina deka nyadi pematak baru bala pengusung tang ngubah landskap pemansang Meradong.
“Pia mega, Pasar Sentral nya udah tentu deka nyendia palan ti lantang sereta ulih nampung bala pedaja ti bedaja muak ke ujung minggu.
“Pengawa nyeleti taman rekreasyen deka ngemanahka agi sitak nya sereta nyadi pematak ngagai bala pengusung,” ku iya.
Kuong Hiing mansutka jaku nya rambau Pengerami Makai Lemai Parti Rayat Sa’ati Sarawak (SUPP) Bintangor ditu, malam ensanus.
Nya alai, iya ngarap semua kaban SUPP Bintangor seruran nanggam pemanah kaul ti ngemeratka pengelantang rayat.
Berebak ari pengeransing perintah, ku iya, pelilih Meradong diatu majak berubah nengah bemacham inisiatif pemansang ti benung ranchak dipejalai.
Iya mega ngelalau semua kaban SUPP terus seati sereta ngiar laya ke tisi dikena meri servis pemadu manah ngagai rayat Meradong.
“Penyerakup kaban parti tu nyadi pugu besai nentu penegap enggau pemansang ekonomi sereta pengelantang rayat.
“Sitak Meradong ngembuan dua pengari rayat iya nya ari parti SUPP enggau Gempung Parti Sarawak (GPS).
“Kemaya hari tu, pemansang sitak tu majak dipeda lalu aku ngarap pemansang tu ranchak agi dipejalai nengah agih belanja ti udah dikemendar Perintah Sarawak enggau Perintah Besai,” ku iya.
