ARTIKEL

Tekat Bakun

Rampa menua meruan beresi

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

Aum Parti-Parti (COP) Konvensyen Langkar Pengawa Ubah Klimet Gerempung Bansa Beserakup (UNFCC) ngempuru bemacham raban pemegai taruh antarabansa ari dunya dagang, perintah enggau komuniti sivil.

Sida nisih pemansang klimet lalu merambu chara mutar penusah klimet ti nuntung selampur komuniti.

Siti pemujur ti besai reti dijapai ba taun 2015 maya semua menua di dunya setuju natak tikas pengangat dunya baruh 1.5-2.0 darjah Celsius di atas tikas sebedau jeman industri lalu nyain siti sempekat ti dikangau Sempekat Paris (Paris Agreement).

Pemesai reti COP ke-28 (COP28) ti diatur taun tu ulih United Arab Emirates (UAE) ari 30 November nyentuk 12 Disember disebut ba siti ripot Gerempung Bansa Beserakup (UN) ti madah dunya ba pelasar nyapai tikas 2.9 darjah Celsius.

Aum nya nyadi lebuh maya ti amat beguna ba tengan timpuh entara Sempekat Paris enggau tagit iya ba taun 2030, lebuh timpuh ti majak suntuk dikena nyapai juluk 1.5 darjah Celsius.

Nya alai COP taun tu mega nyadi Global Stocktake (GST) tauka aum berundingka pemansang dunya.

Aum nya bejuraika pemansang ba pengawa ngurang pengangat dunya ari maya Sempekat Paris disain suba kelimpah nisih pengawa ti meseti dikereja ngambi ke kitai seruran ba pelasar tauka juluk asal.

SIMPUL COP28

COP28 nyengala mantaika penusah nyapai konsensus tauka penemu sama ulih semua menua di dunya.

Pekara nya nunjukka pengawa ti enda tau enda dipejalai menua pengeluar minyak baka UAE dikena ngurang pengangat dunya tang aum nya nerang pasal peragam mensia mayuh ti tusah.

Pejalai belabuh kena 30 November ti udah, enggau pemadah pasal turu pengerugi enggau pengerusak (loss and damage fund) baru dikena nyukung menua lemi ti nyaut kangau ngelaban penusah klimet enggau AS$725 juta (RM3.4 bilion).

Aum nya tembu enggau dramatik kena 13 Disember tu tadi pengudah dipejurai enggau silik.

Semua menua ti ngambi bagi nyapai konsensus tauka penemu sama ti ngujung ke siti sempekat besejarah disain ti besai amat reti iya nya sida deka ngalih ari kereban api fosil (fossil fuels).

Juluk nya disukung lebih 120 menua ba COP28 ti besemaya deka ngasil kuasa ulih dikena baru tauka renewable energy (RE) tiga kali lipat lalu ngelimat kuasa dua kali lipat iya nya siti inisiatif ti diangkat European Union (EU) enggau UAE.

Pia mega enggau komitmen enda mansut sebarang metana (zero-methane emissions) ba taun 2050 ari lebih 50 kompeni minyak enggau gas ti ngeluarka 40 peratus ari minyak enggau gas di dunya.

Aum nya mega meri perati ti lebih ngagai kuasa nuklear.

Lebih 20 menua nyengkaum Amerika Serikat, United Kingdom enggau Peranchis ti setuju nambah kapasiti nuklear tiga kali lipat ba taun 2030 iya nya sebagi ari kimpin enda mansut gas rumah gadung (net-zero emissions).

Baca lain  Peminta raban penyakal ti minta agih belanja sebela deka dirandau 17 April tu

Enggau empas ari ubah klimet ti diasai mayuh menua diatu, perati ukai semina diberi ngagai pengawa ngurang pemansut gas rumah gadung (GHG) tang mega ngagai inisiatif adaptation and resilience (A&R) ti meseti dipejalai.

Nimbang pekara ti dikemerat bemacham pemegai taruh ba COP28 tusah amat lebuh bala penyereta nguji ngurang takah penemu pasal siti teks ti dipesetuju semua.

Bisi sekeda menua madah juluk ti disebut dalam teks nya enda chukup besai, tang sempekat nya nanda pemujur baru dalam kerejasama klimet.

Komitmen “ngalih” ari kereban api fosil nyeremin pemansang besai dalam pengawa dunya mutar penusah klimet dikena nentu pengidup ti meruan agi ila.

Semua mata diatu numpu ngagai chara kitai ngalih ari semina bejaku aja pasal juluk besai ngagai bejalaika pengawa ti tulin.

Pemujur ekonomi gadung bepanggai ba pelajar bekualiti.

BEJALAIKA PENGAWA

Malaysia mega enda kebal ari empas ketegal ubah klimet ti majak jai baka dipeda ba tikas tasik ti majak niki, ujan ti ekstrim enggau bah tunggal ti suah nyadi sereta pengangat balat ti udah diasai kitai dalam kandang berapa taun ti udah.

Emba nya ulih meri empas sosial, ekonomi enggau fizikal ti ngeruga tauka ngerusakka agi menua tu.

Naka 25 peratus Asil Dalam Menua Kasar (GDP) Malaysia ulih dikeruga ba taun 2048.

Asil ari pengawa betanam ulih nurun naka 12 peratus ba taun 2050.

Lebih 250,000 orang engka dipindah ketegal bah.

Naka 15 peratus tebing tasik Malaysia napi penusah tanah tusur ketegal tikas ai tasik ti majak niki kelimpah gaya mua hari ekstrim ti nginsah tebing tasik kitai.

Berindik ari penusah ti besai nya, penyereta Malaysia ba COP28 meri perati ngagai jurai pasal klimet ti digaga muntang ulih UNFCC sereta pengawa ngatur Malaysia Pavilion – endur dialog enggau randau ti disungkak ulih tema Going Beyond: Green Growth, Resilient Community and Sustainable Planet.

Tema ti setipak sereta beguna nya nunjukka pengepuh menua tu ti ngemeratka pengawa mutar penusah klimet seraya nimbang pekara bukai ti dikemeratka menua baka pemansang ekonomi sereta pengawa ngintu rayat enggau rampa menua kitai.

Program ba Malaysia Pavilion pengelama COP28 diatur meri perati ngagai bemacham topik klimet ti seraris enggau tema besai nya.

Forum ti regas diatur ngambi narit perati ngagai pengawa Malaysia mutar penusah klimet lalu kerejasama sereta dialog digaga mudah pengelama 12 hari bekaul enggau topik klimet ti beguna amat.

Malaysia Pavilion ngatur lebih 70 randau panel sereta sesyen bekunsi penemu ari bemacham tuai penemu (thought leaders) enggau gerempung kelimpah ngelaluka penatai lebih 3,500 pengusung ari 56 menua.

Ari sekeda topik bukai ti beguna amat, Malaysia nunjukka kitai benung ngalih ari semina bejaku aja lalu nyingkang ngagai ngereja pengawa mutar penusah klimet.

Baca lain  KJA 2022 diatur 9 Disember di Miri

Pengawa nya nyengkaum mantaika penemu Malaysia pasal kaul ti beguna amat entara pekara wang Islam enggau ubah klimet kelimpah nengkebang Pelin Pengawa Pengerai Plenari Nasional keterubah di dunya.

Kelimpah ari nya, menua kitai mantaika pelin pengalih kuasa enggau National Energy Transition Roadmap (NETR) tauka Pelin Pengalih Kuasa Nasional ti dikeluar apin lama ti udah.

Malaysia mega ngemeratka pengawa ngintu pengeraja asal enggau biodiversiti kitai ti besai amat ngagai audiens dunya.

COP28 mega mantaika kerejasama ti ditempa Malaysia dikena mutar ubah klimet enggau 11 pengawa bekunsi entara kompeni Malaysia enggau kompeni Timur Tengah bekaul topik baka pengalih kuasa.

Chunto kerejasama nya iya nya Sempekat Pemereti Ati entara Malaysian Investment Development Authority (MIDA) enggau Abu Dhabi Future Energy Company (MASDAR).

Sempekat nya ngasil penyampau belanja meranak puku AS$8 bilion (RM36 bilion) ti besai amat dikena nyungkak pemujur RE ila di Malaysia.

Kitai mega teperansang ati meda penyereta ba Malaysia Pavilion ngelui sektor perintah kelimpah kaul ti besai sereta besemangat ari sektor peribit enggau pemegai taruh sektor ketiga, baka Hari Pengawa Bemacham Tikas (Multi-level Action Day) ti ngembuan dialog enggau nembiak, raban bansa asal sereta akademia.

Bemacham pengawa nya ngemeratka momentum sereta semangat kerejasama seraris enggau chara Malaysia ti mungkur selampur menua baka ti digambar ulih konsep Malaysia MADANI.

COP28 nyeremin pengawa ti besai amat reti ba pejalai klimet ti dikunsi semua menua laban aum nya ngempung pemegai taruh besai di dunya ngambi mutar penusah pemadu besai ti ditapi semua menua.

Aum nya mega meri peluang ti beguna amat ngagai Malaysia mantaika pemujur enggau juluk ati menua kitai seraya ngatur dialog enggau audiens dunya.

Diatu meh maya iya semua kitai bejalaika pengawa enggau lengkas.

Malaysia meseti seruran komited napi penusah ti ditapi ila lalu neruska momentum ti diulih ba COP28 seraya menua kitai terus bejalaika pengawa ngambi nyapai pemansang klimet ti positif.

STRUKTUR TEGUH

Sektor kuasa RE dijangka ngena tema struktur ti teguh sereta pusin penumbuh (growth cycle) penatai pemisi ti positif.

Setaun ti udah, perintah udah ngeluarka NETR Bagi Satu enggau Bagi Dua ti mungkur 10 projek penyungkak besai beungkus lebih RM25 bilion.

Projek besai nya bepelasar ke enam tuas pengalih kuasa: penyimat kuasa, RE, hidrogen, bio-kuasa, mobiliti gadung sereta nangkap, nguna enggau nyimpan karbon.

Ba timpuh panjai, NETR merambu ngerembai kapasiti solar ba kadar penumbuh turu ninting taun 14 peratus nyentuk ngagai taun 2050, ti ngukuh penemu positif pasal pemujur bala pengemeran solar.

Ari sukut eksport, Malaysia deka numbuh bursa RE ba taun 2024 ngambi ngemuntang eksport kuasa karan mimit karbon ngaga menua bukai.

Baca lain  Ini selamat ba penusah rumah angus ba Kampung Apar, Singai

Dikena ngamat juluk nya, perintah deka ngubah Akta Bekal Kuasa Kran, nentuka pembeli tunggal lalu nempa model akses parti ketiga.

Bursa karbon nya deka dipejalai ngena chara pembeli tunggal ngambi nadai konflik minat lalu pembeli tunggal deka ditempa ari Tenaga Nasional Bhd (TNB).

Udah nya bursa nya deka nyual kuasa karan ngagai pembida pemadu tinggi enggau tebal agi premium eksport deka diambil lalu diperanak baru ba pengawa ngemanahka agi grid.

PELAJAR BEKUALITI

Pemujur polisi kuasa beresi tauka ekonomi gadung di Malaysia ila bepanggai amat ba tikas pelajar rayat.

Siti ari Juluk Pemansang Meruan tauka Sustainable Development Goals (SDGs) ti pemadu beguna dalam komuniti dunya ti gawa nuju pemela enggau pemansang iya nya Juluk 4: Pelajar Bekualiti.

Juluk nya ngemeratka pengawa nyendia pelajar ti inklusif, sama rata sereta ulih diakses semua.

Juluk nya nyadi kunchi dikena muka pintu ngagai pengidup ti meruan sereta manah agi ila ungkup mensia mayuh sereta komuniti ba serata dunya.

Semua pemandai, pengering, pemansang komuniti enggau pemansang diri dilengkas ulih pelajar bekualiti tinggi.

Pelajar meri orang rega, penau sereta penemu ti dikena sida mansang ba dunya ti seruran berubah.

Kitai ulih munas penyeranta, ngurang gaya idup ti enda bela sereta ngemeratka pemansang meruan enggau nyamin genap nembiak mit tau bulih pelajar bekualiti tinggi, enda ngira asal tauka pendiau.

Meranak puku ba pelajar ukai semina ngaga sekula tauka meli bup teks aja.

Pengawa nya nuntut kitai nempa palan belajar ti engkeman, nyikap pengajar ti landik sereta nguna strategi ngajar ti moden.

Enggau ngereja pengawa nya, kitai ulih mantu nembiak mit nempa runding ti tajam, kreativiti sereta penau enggau pengelandik mutar penanggul ti ulih mantu sida nempa komuniti kelimpah mai ubah ti positif sereta aktif.

Kelimpah ngemeratka penyemela entara lelaki enggau indu, pelajar bekualiti mega kunchi ngagai pemeruan rampa menua.

Bala indu ti bisi akses sama rata ngagai pelajar ngemanahka agi lalu ngangkat pengidup sida kelimpah mantu ngemansang komuniti enggau bala sida sebilik.

Pelajar meri penemu ngagai nembiak pasal pemesai reti nyaga rampa menua enggau meransang ekonomi gadung sereta mechah stereotaip enggau penusah sosial ti ulih nempa dunya ti adil sereta inklusif agi.

Pelajar meh pasport ngagai rampa menua ti meruan, pengidup ti lantang sereta pemujur sosioekonomi semua rayat.
Pelajar meh kunchi ti muka pengulih genap mensia enggau komuniti lalu muka jalai ngagai pemujur dunya ti meruan.

Malaysia, nyengkaum Sarawak, meranak puku ba pelajar bekualiti ngambi negap rebak baru lalu nempa dunya ti meri peluang ngagai semua orang belajar, mansang lalu ngerembai.

NOTIS TENDER

BERITA LAIN

BERITA TERBARU

Kuching, Sri Pahang kongsi mata

KUCHING: Hasrat Kuching City FC (KC FC) untuk meraih kemenangan di laman sendiri tidak kesampaian selepas sekadar seri menentang pasukan Sri Pahang FC dalam perlawanan