KUCHING: Kaban kaunsil menua mangku tanggungpengawa besai ba pengawa ngedutka takah enggau mensia mayuh, kaban kaunsil sereta perintah dikena nentu kualiti pengidup rayat ba menua tu meruan.

Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Datuk Seri Dr Sim Kui Hian madah, raban kaunsilor nya ngarika perintah sereta nyadi raban terabai menua ngagai mensia mayuh.

Ku iya, nya alai sida meseti nyikap diri meri servis ti manah ngagai rayat sebarang maya.

“Aku andal raban kaunsilor menua ulih ngaul sereta bekomunikasyen enggau rayat ba zon baruh pegai sida dikena mutarka penanggul enggau peminta rayat ngagai kaunsil tauka ejensi bukai.

“Endang amat sida mangku tanggungpengawa ti besai, nya alai mensia mayuh diperansang seruran nyukung sida lalu bekerejasama mutarka penanggul,” ku iya.

Kui Hian mansutka nya rambau Program Angkat Sumpah Chairman Baru Kaunsil Mengeri Padawan (MPP) enggau Raban Kaunsilor ba Balai Besai MPP, ditu tadi.