KUCHING: Pemutus Pengawa Bepilih Nengeri (PRN) Sabah meri kelai ti nyengala pasal juluk pengundi deka meda nengeri nya nentu kuing politik sida empu.

Mandal Presiden Parti Pesaka Bumiputera Bersatu (PBB), Datuk Seri Roland Sagah Wee Inn madah, pemutus nya mandang sentimen ti tegap enggau siti pesan ti nyengala iya nya rayat Sabah deka politik sida bepelasarka nengeri nya empu.

“Bepelasarka pekara ti nyadi, aku pechaya nya endang pengingin ati rayat Sabah empu.

“Sepanjai timpuh bekimpin, kitai mayuh ninga rayat Sabah deka nengeri nya dipegai anak Sabah empu,” ku iya.

Sagah bejaku munyi nya rambau dirandau pemberita pengudah ngemata pengawa besilih Sempekat Pemereti Ati (MoU) entara Perintah Sarawak, Gerempung Aspirasyen Pengajar Sarawak enggau ARC Technologies Sdn. Bhd. di Kunsil Nengeri (DUN) Sarawak ditu, kemari.

Iya ti mega Menteri Pelajar, Inovasyen enggau Pemansang Penau Sarawak madah, pemutus pengawa bepilih nya mandang rayat Sabah nulak parti politik ari Semenanjung di kandang menua Borneo.

“Aku ngasai ke parti Semenanjung enda ibuh datai ke Sarawak enggau Sabah.

“Kitai semina bisi siti parti iya nya Parti Tindakan Demokratik (DAP) aja ti majak mimit di Sarawak,” ku iya.

Sagah nyemetak madah, pesan pengundi Sabah nya endang nyengala tang nya bepanggai ba rayat ti nungkap empas ti besai agi.

“Kitai ulih meda enggau terang tang rayat mega patut meda nya enggau terang.

“Nya alai, bepanggai ba rayat mereti ke pekara ti benung nyadi. Tu politik,” ku iya.

Ke rikod, Gabungan Rakyat Sabah (GRS) menang PRN Sabah Ke-17 nengah 29 penuduk lalu Parti Warisan ba penuduk kedua enggau 25 penuduk.