MARUDI: Perintah Besai dipegai Pakatan Harapan (PH) andal amat bala ketuai PH di Sarawak ulih ngemudika menua tu mansang ke mua sereta mulaika mayuh agi hak ti udah lenyau ngelama tu.
Kaban Parlimen Saratok Ali Biju mega madahka diri pechaya rayat Sarawak pintar agi runding beratika bala ketuai ti lurus ati negika hak sida lalu ukai nya salah guna kuasa enggau beambi ulih ba politik aja.
“Perintah Besai keran enggau naka ulih nentuka pekara ngaul pemerat menua tu nyengkaum pekara hak tanah Adat Bansa Asal (NCR) ulih diputar manah.
“Kebuah pia laban pekara tu semak amat ba ati rayat lalu kitai udah dilempaika pengandal ngintu pengelantang enggau nangkup peminta sida kelimpah nyaup mutarka genap penanggul ditapi rayat,” ku Ali madah nyemetak.
Ali ti mega Mandal Presiden Parti Keadilan Rakyat (PKR) mansutka jaku nya rambau Program Pemesai Begulai Enggau Rayat di Rumah Panting Sungai Teniku, Marudi di Miri.
Iya ngarapka bala ketuai renggat baruh kelebih agi bala ketuai raban bansa meri kerejasama rat ngagai Perintah Besai.
“Kitai andal amat bala pemesai renggat baruh ti ngarika nembiak redak kelebih agi di kandang menua pesisir ulih meri sukung enggau kerejasama ngagai kitai.
“Tu dikena nentuka semua pemansang ti dibai ari Putrajaya ulih dipejalai enggau lanchar sereta meri pemaik ngagai rayat,” tandu iya.
Sama datai Kaban Kunsil Nengeri (Adun) Pujut, Dr Ting Tiong Choon, Adun Skudai Tan Hong Pin enggau Bilut Lee Chin Chen.
