KUCHING: Komuniti menua pesisir enda kala dikelaung ari sebarang inisiatif program pemansang kelebih agi ari sukut ekonomi enggau pengelantang pengidup.
Berindik ari nya, Koridor Kaunsil Pemansang Wilayah (RECODA) nengah kerejasama Press Metal Sarawak Sdn Bhd enggau Press Metal Bintulu Sdn Bhd udah mantu 10 iku orang dagang di Kapit enggau Mukah nengah Program COMMUNITY@SCORE.
Dalam siti penerang media, inisiatif tu dipejalai nengah Tanggungpengawa Rama Korporat (CSR) deka ngangkatka pemansang komuniti sereta setipak enggau Juluk Pemansang Rampa Menua (SDGs).
“Nengah pengawa tu, kami deka nyendiaka perengkaguna enggau kereban ti beguna dikena mantu raban dagang mit ngerembai, nerenakka penegap ekonomi di serata Sarawak.
“Di Kapit, pengawa tu udah dikemujur nengah Ejensi Pemansang Ulu Rajang (URDA) di baruh RECODA.
“Enam iku orang dagang dalam pengawa ngait, nyulam enggau kraf marik nerima perengka dagang ungkup mantu sida ngemanahka operasyen sereta ngerembaika bungkur dagang sida,” ku iya.
Ku penerang tu, bekal ngaga marik bisi disediaka ngagai Gerempung Indu Rumah Dennis Langok nentuka penguntung program nya ngerembai ngagai komuniti ti besai agi, kelebih agi raban indu di menua pesisir.
“Inisiatif tu ukai semina nyukung dagang orang ngatika diri tang mega meransang ubah kraf menua tu awak majak ngerembai enggau rembus ngagai makit ti manah agi.
“Ambi ke chunto di Mukah, program nya mantu lima iku orang dagang kedai ruti enggau siku orang berikan menua pesisir.
“Nya ungkup nyikap sida enggau kereban ti diguna dikena ngerembaika dagang lalu ulih besemekih dalam dunya dagang ti deras mansang jeman diatu,” ku penerang nya.
