KUCHING: Pengawa bejalaika sistem baru rejister Endowment Fund Sarawak (EFS) enggau Bantu Indai Baru Beranak (BIB) nengah chara online ulih nambah penyikar enggau pengelanchar atur peminta raban apai indai.

Menteri Pemansang Indu, Nembiak Mit enggau Pengelantang Komuniti Sarawak, Datuk Seri Fatimah Abdullah madah, sistem online tu engkeman agi enti dibanding ngena chara manual ti begunaka bala peminta datai ngagai opis nya.

“Sistem tu belabuh dipejalai taun tu udah meri empas ti manah ari sukut peminta lalu kami ngarapka pengawa tu ulih nginsur timpuh pengawa ngagai semina sebulan nyentuk tiga bulan aja.

“Sebedau sistem tu dipejalai, kami begunaka timpuh tiga nyentuk enam bulan dikena ngadu peminta ti diterima,” ku iya.

Fatimah bejaku munyi nya lebuh pengudah bejadi Program Nyua Bantu EFS enggau BIB ba Begunan Baitulmakmur II ditu, ensanus.

Berindik ari nya, iya mega ngarapka selinting ngemandak timpuh atur pengawa ngagai sebulan ulih dikemujur pengudah 1 Julai 2026.

“Kami nyelinting timpuh ungkup atur nya berengkah ari peminta nyentuk akaun mujur dibuka ulih diinsur ngagai semina sebulan aja,” ku iya.

Ba pekara sama, Fatimah madah ke bisi 5,230 peranak Sarawak tauka 60 peratus ari penyampau 8,743 iku ti patut udah nganjung peminta EFS ungkup taun tu udah dirikod naka April 2026.

“Kitai melaba peratus peminta deka nambah laban tebal agi apai indai agi ba timpuh ti dikemendar nganjung peminta. “Sida agi ulih nganjung peminta ba timpuh setaun pengudah beranak.

“Opis menteri deka terus nesau ngambi semua peranak Sarawak terus nerima pemaik tu,” ku iya. Ba program nya mega, iya bisi nyua EFS enggau BIB ngagai tujuh anak mit enggau tiga indai.

Tujuh anak mit nya nyengkaum tiga anak sapit ari siti ruang bilik enggau dua anak sapit ari dua ruang bilik.