Rikod Sarawak ba Lumba Nyemerai Para Tebuka Malaysia 2019 ngemantup ati

KUCHNG: Semua atlit nyemerai Para Sarawak ke dibai nyereta Lumba Tebuka Malaysia di Palan Akuatik MPK, Kuantan Pahang chukup ngemantup ati lalu majoriti sida pulai mai bulih midul emas.

Ketuai Jurulatih Nyemerai Para Sarawak, Syarbini Kedri madah pemujur ke dipandang atlit Sarawak ba lumba tu chukup ngemantup ati bepelasarka pengulih atlit-alit ke baru ke chukup nyulut.

“Pengulih bala atlit kebendar nadai disadang ngelui ari tagit bala jurulatih, sida ke dibai nadai disadang tau bulih midul emas baka Rapehlson, Ceasar, Adilas enggau Jeffery Noel.

“Nyadi ari sukut rikod sida udah mandangka pengulih ke numbas iya, ari perati penuh pengulih sida tau dikumbai manah.

“Ngelama tu kitai semina belatih pagi, ukai penuh pagi lemai tang sida mujur tejapaika pemutus ke manah.

BEPENAU… Semua atlit enggau pemesai begambar kenang pengudah tembu Lumba Para Nyemerai Tebuka Malaysia 2019 di Pahang, ensana.

“Sida bepun belatih ujung bulan Januari sebedau nurun kitu (Pahang), tau dikumbai sebulan aja. Terubah iya kami enda tagit sebarang midul tag semina deka meri pelebaka ngagai sida,” ku iya madah nengah WhatsApp ngagai Suara Sarawak.

Nangkan nya, Syarbini madah tuju mai atlit nyereta lumba serak tu laban deka ngelala bagi atlit ke bepenau ngarika Sarawak ungkup pekit ke lebih besai dudi hari.

“Pekit tu diguna kami dikena nguji pengelaju bala atlit-atlit baru. Iya ke nyata, empai bisi tim ke nyengala ulih ngalahka Sarawak, taja pia kitai tetap naka ulih belatih awakka bulih pemutus ke lebih manah ba maya dudi.

Taja pia, ungkup serak tu tim Sarawak enda mai semua atlit nyereta pekit baka kategori S5, enti dibai tentu kitai nyapu semua midul.

“Kitai mega nadai mai atlit ari kategori S9, kitai mai atlit S10 dika nguji tikas pengelaju.

“Ukai reti kitai alah ba pekit tu, laban reti pekit Tebuka Malaysia tu iya nya endur kitai ngiga atlit baru ke bepenau diangkat ngarika Malaysia ngagai renggat ke lebih tinggi.

NGEMANTUP ATI…Raban jurulatih enggau atlit Para Nyemerai Sarawak begambar nyadika pengingat pengudah pekit.

“Semua nengeri bisi program pemansang ke sebaka, nyadi tu siti pengawa manah ke pemaik bala atlit Para,” ku Syarbini nerang silik.

Ba pemutus penuh, tim Sarawak mujur mai pulai 21 midul nyengkaum enam midul emas, lapan midul perak enggau tujuh engkeraju ba lumba tu.

Lapan iku atlit Para Sarawak ke ngambi bagi ba lumba tu iya nya Ardiles Anak Benson, Ceasar Anak Dayong, Julius Anak Jeranding, Jeefery Noel Anak Dana, Raphelson Richard Hamit, Rusdianto Rusmadi, Kho Zhen Wee enggau Mohd Adib Iqbal Bin Abdullah.

ENDA LEBU…Empat atlit baru Sarawak ke bela bulih midul emas ba lumba serak tu iya nya (ari Kiba) Jeffery, Raphelson, Ceasar enggau Rusdianto.