LUNDU: Projek Nyeruri Sistem Paip Ai Bukit ba Kampung Kendaie, sitak Bukit Batu enggau Kampung Pasir Hilir ti beungkus urung RM1.5 juta deka ngemanahka agi fasiliti bekal ai ba genturung pendiau nya.
Kaban Kunsil Nengeri (ADUN) Opar, Billy Sujang madah, pengawa nyerahka projek ti udah tembu nya ngayanka pengeransing perintah nentuka peranak menua nya ngasai ke bekal ai ti meruan enggau lantang agi.
“Projek tu mungkur pengawa nyambung batang paip HDPE pemanjai urung 30 kilometer, ngaga dua tangki nyimpan ai enggau tekat ai dikena meri pemaik ngagai 170 rumah di genturung pendiau nya,” ku iya.
Billy madah munyi nya ba Pengawa Nyua Projek Tembu Nyeruri Sistem Paip Ai Bukit Kampung Kendaie ti diatur seretai enggau Program Ngalayakng Dautn Bonos di Kampung Kendaie, Hari Enam tu tadi.
Ku iya, perintah deka terus meri perati ngagai peminta pemansang ba sitak DUN Opar nyengkaum bejalaika mayuh projek baru dikena nambah tikas pengelantang rayat.
Billy madah, pengawa mai bekal ai beresi ngagai sitak Zon Biawak sereta projek nyeruri Jalai Kendaie-Sedaing ti dipelaba ditinda bulan Septembe tu entara agenda pemansang ti benung diperati.
Kelimpah ari nya, Program Ngalayakng Dautn Bonos ngaul peranak Kampung Kendaie, Kampung Pasir Tengah enggau Kampung Pasir Hilir mega nyadi pelasar manah dikena negapka penyerakup sereta semengat beripai entara komuniti. – EDISI UKAS
