KUCHING: Perintah Sarawak udah ngemendarka agih belanja sepenyampau RM10 juta ungkup digitalisasyen ba 150 ari 271 klinik selampur Sarawak.
Sapit Premier Sarawak, Datuk Amar Dr Sim Kui Hian, madah Opis Menteri Pengerai Mensia Mayuh, Pengawa Berumah enggau Perintah Kandang Menua (MPGLG) udah berandau enggau Perintah Sarawak bekaul enggau agih belanja nya taun siti nyin tadi.
Ku iya, digitalisasyen klinik beguna dikena ngulih rikod pengerai ti deka ngurang pengawa bekena perengka guna ba klinik.
“Tu deka dikena 73 peratus pesakit di Sarawak ke nurun berubat ba klinik.
“Reti iya, enti kitai berubat ba klinik siti, dia klinik bukai ulih meda rikod kitai, nyengkaum ubat lalu enda ibuh mai bup rikod pengerai alai bisi pesakit mega enda nemu nama ubat ke diempa sida,” ku iya.
Iya bejaku munyi nya ba aum media sepengudah ngenataika jaku pengelalu ba Aum Asia Pasifik Pengerai Mensia Mayuh ke-8 ditu seharitu.
Nangkan ke nya, iya ke mega Menteri MPHLG madah, agih belanja nya patut diberi taun siti nyin tadi tang penerang ari Perintah Besai bekaul program digitalisasyen nya ngujungka agih belanja laun diberi.
Ku iya, Opis Menteri iya nerima dua agih belanja ari Perintah Nengeri enggau Perintah Besai alai diatu sida deka ngemeratka pengawa digitalisasyen ba semua 271 klinik di Sarawak.
Sama bisi datai maya nya, Kaban Kunsil Nengeri (ADUN) Opar, Billy Sujang, Direktor Opis Menteri Pengerai Nengeri Sarawak (JKNS), Dr Veronica Lugah, Mandal Chairman APCPH ke-8, Dr Tahir Aris, sereta temuai dipebasa bukai.
