KUCHING: Lebih 105,000 orang betanam betupi di selampur Sarawak deka ngasaika pengelantang nengah pengawa ngaga lebih 300 iti projek jalai ke beungkus urung RM95 juta sepemanjai taun tu.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, projek nya nyengkaum ngaga enggau ngadu jalai kebun lebih 1,900 kilometer nengah macham agensi enggau sukung Perintah Sarawak sereta Perintah Besai.
Ku iya, jalai ke manah ukai semina ngemuntangka agi ngelawa kebun tang mega mai asil lengkas agi ngagai makit sereta ngurangka pengerugi.
“Perintah semampai deka ngemanahka agi infrastruktur jalai kebun ungkup orang betanam betupi di nengeri tu,” ku iya.
Iya madah munyi nya maya ngenataika jaku simpul ari opis menteri iya ba Aum Kunsil Nengeri (DUN) Sarawak Ke-19, Hari Dua.
Ba pekara bekaul, Dato Sri Dr Stephen Rundi madah, Perintah Sarawak bela ngungkupka belanja RM93.8 juta nengah Langgur Pemansang Malaysia Lumpar Ke-13 (RMK13) dikena ngaga lapan iti propek infrastruktur parit nengah Opis Parit enggau Entali Ai (DID) Sarawak.
Ari penyampau nya, RM19 juta udah diterima ungkup taun tu lalu RM4.4 juta udah dikena naka ke diatu.
Iya madah, dua iti projek benung digaga lalu enam iti agi ba macham tikas deka digaga.
Kelimpah ari nya, DID Sarawak bela dilempaika pengawa ngatur belanja RM998.1 juta nengah beberapa agensi pemansang kandang menua ngaga 446 iti projek infrastuktur ke nyengkaum jalai kebun, nyaga sungai enggau tebing tasik sereta sistem parit betanam betupi. — EDISI UKAS
