KUCHING: Apai indai enggau bala anak ti gian main gajet diatu majak ngirau ke ati laban ngachau jam begulai diri sebilik sereta tau ngeruga pengelantang ruang bilik.

Sapit Menteri Pemansang Indu enggau Nembiak Mit Sarawak, Datuk Rosey Yunus madah, penanggul nadai awak ketegal gian main kereban digital entara isu pemadu ramai ba pengidup moden diatu.

“Enti kitai nyebut pasal awak, bala anak nyinuk main telefon binching aja. Ukai semina bala anak, apai indai pen sebaka, kelalu mayuh awak bepegaika telefon lalu nadai awak begulai enggau diri sebilik,” ku iya.

Rosey nyebut pekara nya lebuh dirandau media pengudah Pengawa Nangguh Kus Pengasih Apai Indai Digital Siri 1/2026 di Palan Konvensyen Borneo Kuching (BCCK), ensanus.

Iya madah, ba dunya nadai sekat, mensia nadai pilih bukai kelimpah nelebaka diri enggau pemansang teknologi, tang semua nya meseti bisi lebas.

“Kitai enda ulih ngenggaika teknologi, kitai meseti pandai ngena, tang kitai patut mega nemu lebas,” terang iya.

Rosey mega ngingatka, kelalu gian bemain gajet nadai betagang kenyau ari umur mit tau meri empas negatif ngagai pemansang bala anak.

“Kitai meda jam, nama ke bisi ba telefon binching, enti enda anak kitai deka tusah ila, kelalu gian enggau gajet tu,” ku iya.

Berindik ari nya, iya minta apai indai meseti tegap penemu nyengkaum natak jam ngena kereban sereta mantis utai ti diakses bala anak.

“Kitai tau ngurangka jam, nutup sekeda website ti enda ulih diterima bala anak, kitai patut ngepun ari diatu,” jaw iya.

Iya mega madah, penemu diulih ari kursus enggau bekunsi kes kebendar nyadi baka ditipu nengah tali arus ulih mantu nambah penemu enggau pengadang apai indai ngagai penanggul digital.

Rosey nyemetak madah, enti nadai belebas, teknologi tau endar ngeruga ruang bilik. – EDISI UKAS