JULAU: Rumah Chat Chemalien, Nanga Bilat Entabai ditu dituntung penusah angus urung pukul 1 ngalihari tadi.
Penerang ari Palan Gerakan Operasyen Bomba Sarawak dalam ripot tumu madahka penusah nya udah nganguska 20 buah bilik rumah panjai ti diuan 142 iku peranak.
Piak bomba nerima kangau urung pukul satu lemai ti madahka 80 tauka 90 peratus rumah panjai nya udah angus ketegal api balat ngerekai.
Komander operasyen madahka nadai sumber penatai ai ba palan rumah panjai nya semina bisi sebuah pegung mit aja.
Takah pejalai piak bomba ngagai palan penyadi penusah angus iya nya 71 kilometer ti ngambi urung sejam 24 minit pejalai.
Nyentuk berita tu ditulis, piak bomba agi benung bejalaika pengawa madamka api ti nganguska rumah panjai nya.
Pansik tumu madahka penusah nya bepun nyadi ari dapur sebuah bilik rumah panjai.
Nangkan nya, Palan Servis Dun Meluan madahka sida nerima kangau madahka penusah angus nyadi ba Rumah Chat Chemalien urung pukul ngalihari.
“Nitih ripot ke baru diterima Palan Servis Dun Meluan madahka penusah angus benung nyadi ba Rumah Chat Chemalien, Nanga Bilat.
“Api dipelabaka bepun ari dapur sebuah bilik di rumah panjai tang tu semina ripot tumu aja,” ku penerang ari Palan Servis Dun Meluan.
