BA Ulu Paku, Betong ti agi dibungkur kampung ti kaya enggau pengeraja asal sereta jauh ari pengiruh pengidup ba mengeri, bediri reregah siti rumah panjai ti ukai semina endur komuniti Iban beridup.
Tang mega rumah panjai ti nyadi siti sukut pengidup nyimpan tipan sejarah, adat, peminta mensia enggau kaul ti chukup rat entara mensia enggau rampa menua.
Rumah Mendit Unsu, Penom ukai semina siti rumah panjai kayu nitih ripih pintu ruang bilik, tang mega nyadi siti pesaka ti majak idup nengah tetiap peranak ti diau mendam ba baruh siti perabung.
Ari sada orang tuai ti meruan nusui cherita sida kelimpah, nengah jari indu ti puh enggau lanchat betenun sereta nengah rebak biak ti diatu nampung pesaka asal bansa kitai ngasuh Rumah Mendit majak nyulur pesaka asal nya ari rebak siti ngagai rebak siti.
Peneleba diau ba rumah panjai chukup berega laban enda berasai jam majak beputar tang ati majak rindang diau ba endur ti chukup meri pengelantang.
Maya pagi hari, lebuh mata panas manchar endur ngelingi Bukit Sepindah enggau Bukit Gelong Gundai, rumah panjai belabuh richah enggau bemacham aktiviti ari peranak dia ti mandangka daya idup ditampung kenyau ari tubuh aki ini kitai kelia.
Ba rumah panjai nya, sida belabuh ngereja pengawa, bisi ti berandau ba rumah lalu bisi mega benung ngintu utai tanam.
Pengerichah pagi hari nya nunjukka rumah panjai nyadi siti palan rama ti ukai semina nyendia endur diau, tang mega nempa chara mensia berandau, bekerejasama enggau negut semangat begulai.
Ba kitai Iban, rumah panjai ngembuan chukup besai reti laban ditu nyadi palan adat dijaga, endur ruang bilik negut kaul, penemu asal dikerembai enggau identiti majak disagu.
Tiap sukut ba rumah panjai bisi guna enggau cherita kelebih agi ruai ti nyadi kedap pengidup begulai, endur begempuru, ngelalu penatai temuai, baum enggau bekunsi peneleba ti nyadi sebagi ari jerana pengidup.
Ba ruai tu mih, kitai nganchau tikai lalu ngemerat pengawa sama besaup, bebasa ke pangan diri lalu nyaga pengelantang komuniti ari rebak siti ngagai rebak siti.
AGI TEGUH
Penyelai Rumah Panjai Penom majak gah lebuh berati ke turai sejarah ti ditaruh ba struktur rumah panjai nya.
Didiri ba taun 1926 ngena kayu tebelian, rumah panjai tu bukti pemintar peranak suba ti mereti ke rampa menua lalu milih kayu pemadu tan sereta teguh nentuka rumah sida ulih teguh bediri ngilah jeman.
Kayu tebelian ti ditemu chukup tan enggau teguh ukai semina nyadi pugu fizikal rumah panjai, tang mega nyadi lambang peneguh komuniti ti ulih ngetan pesaka asal taja napi ubah besai ba pengidup.
Manggai 100 taun pengudah didiri, Rumah Panjai Penom agi bediri nyadi saksi ngagai mayuh ubah ti nyadi ba komuniti.
Kayu tebelian ti dikena ngentak rumah panjai ukai semina nyadi kereban berumah ti bisi rega sejarah, tang mega nyimpan pengingat pasal pengidup, rebak lama enggau baru kelebih agi ubah ari pengidup lama ti bepanggai ba rampa menua nyentuk jeman moden ti nukang mayuh agi peluang pelajar, ekonomi sereta kaul enggau dunya luar.
Penuduk Rumah Panjai Penom ti didiri entara Bukit Sepindah enggau Bukit Gelong Gundai mega nambah pengelain ngagai pesaka asal nya laban mandangka kaul rat entara mensia enggau rampa ngelingi sida.
Bukit, kampung, sungai enggau tanah nyadi sebagi ari pengidup ti nempa budaya enggau penemu peranak.
Kaul peranak Penom enggau rampa menua mega ulih dipeda nengah tradisyen tekstil enggau ngena utai tumbuh asal ba kampung nyadi sebagi ari penemu asal ti dikena ngaga chura asal ba kain tenun.
Penemu pasal utai tumbuh, chara ngaga chura sereta betenun nya mandangka baka ni penemu mensia mayuh ngagai pengeraja asal jauh sebedau konsep pemeruan matak perati dunya diatu.
Rumah Panjai Penom mega mansang nitih ubah jeman ke alai peranak ba rumah panjai nya nambah ari 16 ngagai 21 pintu.
Pintu rumah panjai ti nambah tu ngembuan reti ti dalam laban mandangka penegut kaul komuniti ti keran deka idup begulai ba siti perabung.
Taja dunya moden ngenah pengidup baru, peranak Penom agi meda rumah panjai nyadi sebagi ari identiti sereta genturung ti deka ngempung sida enggau urat budaya sereta sejarah asal ruang bilik.
Diatu, Rumah Panjai Penom diiring Tuai Rumah Mendit Unsu ti nampung ngesan tanggungpengawa nyaga pengelantang komuniti sereta nentuka adat enggau budaya komuniti Iban majak dibasa sereta dikemegah.
Pejalai peranak Rumah Panjai Penom enda kala diserara ari ubah ti nyadi ngelingi nya laban siti pesaka asal ti idup ukai enda beginsit tang nyingkang nipak pemansang ngambi peranak nampung pengawa nya majak bisi peluang lalu enda ngasuh identiti asal lenyau.
Ba konteks tu, pemansang infrastruktur ba Penom mai siti ubah besai ngagai pengidup peranak lebuh kaul enggau dunya majak ditegap seraya ngerandang peluang baru ngagai mensia mayuh ngerembai ekonomi lokal, ngelaku budaya sereta nentuka pesaka asal nyadi sebagi ari peneguh pemansang menua pesisir.

BELA MANSANG
Sapit Premier Sarawak, Datuk Amar Douglas Uggah Embas lebuh nibar jaku ba sebengkah program di rumah panjai nya madah, Rumah Panjai Penom diatu majak nyamai dilawa nengah rentayan jalai nyengkaum pemansang Jalai Besai Pan Borneo sereta projek Jalai Ulu Paku enggau Jalai Penom/Ulu Bayor/Danau.
Ku iya, pemansang nya ukai semina ngemuntang pejalai peranak, tang mega ngerandang mayuh agi peluang ekonomi ngagai peranak Penom nengah aktiviti betanam betupi, agro dagang temuai, industri kotej sereta krafjari ti bisi rega budaya.
“Rumah Panjai Penom ulih dilawa nengah Jalai Besai Pan Borneo pengudah Jalai Ulu Paku enggau Jalai Penom/Ulu Bayor/ Danau tembu menyana,” ku iya.
Ba Rumah Panjai Penom, pemansang tu mai siti ubah nyengala laban nentuka pesaka asal ti ngelama tu mansang ba komuniti menua aja belabuh narit perati orang bukai.
Taja pia pemansang nya ukai mai reti identiti asal meseti berubah tang pemansang nyadi siti jematan ti nyantil tradisyen lama enggau peluang dudi hari.
Uggah mega madah, Penom ngembuan pengeraja asal lalu ulih diserungkai chara meruan nyengkaum peluang bekaul dagang karbon dudi hari.
“Mayuh pemansang udah dipejalai ditu baka jalai alun, entepan entukar, tanju baru, skim tagang sereta projek Program Transfomasyen Menua Pesisir (RTP) enggau ke bukai,” ku iya.
Berebak enggau nya, iya ngelalau rebak biak begulai enggau perintah nentuka Penom majak dikemansang lalu nyadi rumah panjai chunto.
Ba pemansang ti majak deras diatu, Rumah Panjai Penom mandangka tradisyen enggau pemansang moden ukai beserak lalu bela ulih mansang lebuh peranak mereti ke budaya ukai nekul pemansang tang ulih nyadi pugu pemansang ti besai agi reti.
Pengelain ti dikembuan Rumah Panjai Penom tu mih kebuah dipilih nyadi nalan ngatur Borneo Interwoven: Jalinan Borneo 2026, siti program ti mai pesaka tekstil, krafjari enggau penemu asal ngagai panggau antarabansa.
Pengawa milih rumah panjai tu ukai diatur ketegal faktor sejarah tang laban Penom nya empu nyadi chunto pemadu manah baka ni sesebengkah komuniti agi ngetan pengidup lama sambil nukang peluang ngagai inovasyen enggau kerejasama global.
Program ti diatur pengelama lima hari, belabuh ari 27 nyentuk 31 Julai 2026 nya ngempuru urung 120 penyereta nyerangkung tukang tenun, pemekuh chura asal, penengkebang pisin, pemansik sereta pemekuh industri kreatif ari selampur Borneo enggau rantau antarabansa.
Penatai sida nentuka Rumah Panjai Penom nyadi palan betemu entara bemacham budaya, peneleba enggau penemu ti bekunsi siti juluk; nentuka pesaka tekstil majak mansang ba dunya moden.
Borneo Interwoven: Jalinan Borneo 2026 mai pesan pesaka enda patut semina ditaruh nyadi kenang, tang meseti terus dipelajar, dikerembai enggau diberi seput baru ngambi ulih nyadi pun peneguh ekonomi ngagai komuniti.
DITAPAT TEMUAI
Ku Menteri Pemansang Indu, Ruang Bilik enggau Komuniti, Datuk Seri Nancy Shukri, program nya mandangka baka ni pesaka asal ti ditampung ari tubuh aki ini kitai kelia ulih nyadi pun peneguh ekonomi enggau peluang pemansang diri.
Iya mega madah ke program nya nyadi medium nempa mayuh agi indu ti bisi pengandal, landik enggau ulih nyadi tuai.
“Pesaka tekstil ukai semina bekaul pemanah asil keranjai jari, tang mega bisi rega ekonomi enggau rama ti besai agi kelebih agi raban indu ba menua pesisir ti ngelama tu ngesan pangku pengawa besai nentuka pengelandik asal baka betenun, ngaga chura asal enggau ngaga asil krafjari majak beretan.
“Program tu mega nyadi chunto baka ni komuniti artisan ulih ditegap nengah pengawa bekunsi penemu, teknologi enggau rentayan antarabansa.
“Nengah chara baka tu, pesaka asal nadai agi dipeda semina nyadi produk budaya, tang mega nyadi industri kreatif ti bisi pengulih majak mansang,” ku iya.
Ba peranak Penom, penatai penyereta ari mayuh menua mega ngasuh sida gagit enggau meri peneleba ti chukup berega laban nya keterubah iya ruai rumah panjai ti ngelama tu endur sida duduk berandau nyau nyadi nalan bedua penemu ari bemacham pemekuh budaya.
Bala penyereta antarabansa ukai semina datai berati ke asil tenun, tang mega mereti ke pejalai tetiap asil keranjai jari.
Sida meda baka ni sesebengkah motif bisi cherita, baka ni chura bisi kaul enggau rampa menua lalu baka ni tetiap keranjai jari nusui sebagi ari pengidup komuniti.
Tebal agi, bala penyereta madah ke peneleba diau ba Rumah Panjai Penom meri peragam bekaul pesaka pemadu berega ukai semina ba asil keranjai jari tang mega ba komuniti ti naruh penemu nya.
Ditu mih pengelebih Borneo Interwoven; ukai semina mai dunya datai ke Penom, tang mega nukang peluang ngagai peranak dia bekunsi cherita ngagai dunya.
Borneo Interwoven: Jalinan Borneo 2026 di Rumah Mendit Unsu, Penom ukai semina mai nama siti komuniti menua pesisir dikelala dunya tang mega mandangka baka ni rumah panjai ti ngelama tu nyadi palan pengidup bansa Iban ulih nyadi endur berandauka budaya ti ngempuru mensia ari mayuh tirai juru.
Ba program ti ngempuru tukang tenun, pemekuh chura asal, pemansik, penengkebang pisin enggau pemekuh industri kreatif ari mayuh menua, pekara pemadu berega ti dibai bala penyereta pulai ukai semina penemu tang pemereti ati bekaul tetiap pesaka asal nya bisi ‘semengat’ ti semina ulih dipereti lebuh kitai semak enggau komuniti ti agi ngibun pekara nya.
Ba penemu bala temuai antarabansa ti datai, peneleba diau bemalam ba Rumah Panjai Penom sekumbang program nya meri siti peragam baru senentang baka ni budaya agi idup ba pengidup komuniti lalu ukai semina dipandang nyadi keresa sejarah.
Sida meda kediri empu baka ni tradisyen ditampung nengah kaul ruang bilik, baka ni penemu lama agi dikena asil keranjai jari baru sereta baka ni peranak dia nyebela entara pengawa nyaga pesaka asal enggau pengidup moden.
Nya alai, program tu meri awak ngagai bala penyereta ari bemacham budaya mereti ke tekstil asal ukai semina bekaul kain, ubung tauka chura sereta ukir ti narit ati tang mega siti turai sejarah ti mandangka kaul mensia enggau rampa menua, pengarap, pejalai komuniti enggau peneleba idup ti ditampung pengelama bepuluh taun.
Tiap motif ti diasil bisi cherita kediri empu, tiap chura ti dikena mai kaul enggau rampa menua lalu asil tenun nyadi bukti jari mensia ulih nyimpan pengingat ti enda ulih disilih teknologi.





