Rumah patut disikap kereban pengerara api

KUCHING: Program Siti Ruang Bilik Siti Kereban Pengerara Api patut dipejalaika di Sarawak ngambika ulih mai komuniti sedarka agi penusah angus ba menua tu.

Direktor Opis Bomba enggau Penyah Penusah Malaysia (JBPM) Nengeri Sarawak PKPjB Khirudin Drahman @ Hussaini madahka program tu endang patut dipejalai ngambika genap ruang bilik bisi disikap siti kereban pengerara api ba rumah sida.

“Taja undang-undang nadai neritka atur dalam pekara tu, tang nya siti pekara ti patut ngambika komuniti seruran sedar ngagai penusah angus ti suah nyadi.

“Ba mayuh kes penusah angus nyadi, kereban pengerara api ulih mantu sida ke ngempu rumah ulih nyeliahka penusah angus tumu,” ku iya.

Khirudin madah munyi nya ba aum pemberita pengudah Pengerami Bebaris Ninting Taun JBPM Sarawak di Dewan Serbaguna Indu Opis JBPM Sarawak ditu tadi.

Nangkan nya ku iya, penemu komuniti pasal pemesai guna kereban pengerara api tu agi kurang endar lalu tu patut ditemu genap komuniti ngambika lebuh penusah nyadi, sida ulih nagang api ari nyerarai ke bukai.

Suara Sarawak