Rumah sembiang meseti digaga manah

Perintah ngagihka RM30 juta dikena mantu Unifor

KUCHING: Perintah Sarawak udah ngagihka belanja RM30 juta dikena mantu Unit Pekara Pengarap Bukai (Unifor).

Kepala Menteri Datuk Patinggi Abang Johari Tun Openg madahka agih tu dikena mantu raban Unifor ngaga baru tauka nyeruri rumah pengarap pupu bansa di Sarawak.

“Enti perengkaguna dikena sembiang enda meruan, baka ni kitai ulih besembiang?

“Kitai ti idup ba menua tu patut ngembuan chara pengidup ti manah laban kitai diau ba ‘universal’ ekosistem,” ku iya.

Abang Johari bejaku munyi nya ba Pengerami nyuaka replika chek RM30 juta ngagai Unifor ba sebuah hotel tebilang ditu, kemari.

UNGKUP PENGELANTANG…Datuk Patinggi Abang Johari Tun Openg (dua kiba) nyuka replika chek ngagai Direktor Unifor Dr Ngenang Jangu ba sebuah hotel tebilang ditu, kemari.

Ku iya, dalam megai pengarap kitai patut bedisiplin, idup enggau lantang sereta likun laban nya endang diajar petara ba semua pengarap.

“Kitai patut ngaga ekosistem, bedisiplin, gawa bebendar enggau nambahka penau diri.

“Nya kebuah, aku madahka kitai semua patut ngembuan pelajar ti meruan, laban pelajar nya kunchi pengidup,” ku iya.

Tambah iya, pupu bansa di Sarawak endang begulai manah kenyau dulu suba laban nadai belaya enggau pengarap bukai.

“Kitai patut idup ba pengelantang laban rayat pupu bansa patut segulai sejalai.

“Enti kita deka ngena jaku ‘Allah’, kena meh nadai aku nganu!” ku iya.

Tandu iya, Perintah Sarawak tauka Gempung Parti Sarawak (GPS) deka terus ngelindung pekara pengarap di menua tu ngambi enda diruga penemu bukai ti semina ngasuh belaya.

“Aku empu tu muslim, tang aku bepegai ba pengarap tetap adil ngagai sida ti megai pengarap muslim enggau ukai muslim,” ku iya.

Unifor ditumbuh kena April 2017 awakka ngempung pengarap bukai ti bisi di Sarawak ngambika besatu, berundingka penanggul ba pengarap enggau ke bukai.

Sama bisi datai Sapit Kepala Menteri ti mega Menteri Betanam Betupi, Tanah Adat enggau Pemansang Kandang Menua enggau Menteri ti megai Tanggungpengawa ke atas Unifor Datuk Amar Douglas Uggah Embas, Menteri Kaunsil Kandang Menua Datuk Prof Dr Sim Hui Kian enggau bala bukai.