Rundi ngabas Projek Rayat di Dun Kemena

BINTULU: Menteri Utiliti, Datuk Sri Dr Stephen Rundi Utom udah ngabas projek rayat ba sitak Dun Kemena, ditu ensanus.

Projek rayat tu nyengkaum nyeleti jalai ngelawa Rumah Timban sereta nyeleti penusah tanah tusur ba belakang Rumah Timban enggau Rumah Agnes Mampak.

Kededua projek ba Rumah Timban enggau Rumah Agnes Mampak nya projek nyeleti dipejalai ngena agih belanja Projek Jalai Genturung Pendiau (JPD).

Rundi ti mega Adun Kemena mega udah limpang ngabas projek ngaga baru Jematan Kemena (Sebauh) enggau projek ngaga baru jalai Kampung Hilir Sebauh.

Kededua projek nya projek rayat ti udah dikemendar Kepala Menteri Datuk Patinggi Abang Johari Tun Openg lebuh nemuai ngagai Pelilih Sebauh sebedau tu.

Rundi mega udah mendingka penerang pasal projek ngaga baru Opis Pelilih Sebauh ti nyau deka tembu sebedau nampung pejalai matau enggau ngabas projek nyeleti jalai Rumah Nicholas Bat di Jalai Ulu Sebauh.

Sama datai Sekretari Politik Kepala Menteri, Jenny Bangga, Pegawai Pelilih Sebauh William Manggoi sereta Injinir Unit Opis Kereja Raya Bagi Menua Bintulu, Law Pit Hwa.

Suara Sarawak