RUU dikemendar Dun, pemujur ungkup rayat

KUCHING: Perambu Undang-Undang (RUU) Kunstitusyen Nengeri Sarawak (Ubah) 2020 ti dikemendar Dun kemari nandaka pemujur rayat Sarawak, pia ku Menteri Kaunsil Kandang Menua enggau Pengawa Berumah Datuk Seri Dr Sim Kui Hian.

Ku iya, ubah nya beguna amat laban Sarawak nya aja nengeri ba Malaysia ti bisi undang-undang nentuka Adun nya rayat asal menua tu.

“Sehari tu (kemari) hari besejarah ngagai rayat Sarawak laban keterubah iya, Dun semina ungkup anak Sarawak.
‘Kebuah pia laban ubah RUU nya dikena neritka undang-undang ngambika Dun dipegai rayat Sarawak belama iya.

“Undang-undang enda ulih diinsur baka ti dipadahka bala bukai,” ku iya ba aum pemberita ba Aum Dun, ditu kemari.

Dr Sim ti mega Presiden Parti Sa’ati Rayat Sarawak (SUPP) nyemetak madahka Perintah Gempung Parti Sarawak (GPS) enggau SUPP deka negika hak rayat Sarawak ungkup rebak dudi.

Ngelansa pasal semilan pengari penyakal ti mantah ubah RUU nya kelebih agi ngubah takfrif ‘peranak asal’ dalam Perkara 16 Klausa 2 (1) (c) Perlembagaan Negeri Sarawak, iya madahka sida enda patut ngubah nya.

“Kebuah pia laban enti sida amat taluk enggau sayauka menua tu, sida mesti nyukung undang-undang nya kelebih agi lebuh nyaga hak rayat enggau menua tu.

“Dua hari ke udah, sida madah deka nyikut enti jaku ‘rayat Sarawak’ disempulang tang pengudah nya dipasuk, sida inginka utai bukai,” ku iya madah pasal Chairman DAP Chong Chieng Jen ti madahka leka jaku ‘rayat sarawak’ nadai disebut dalam RUU nya.

Nambahka nya ku Kui Hian, penyakal bisi peluang negika pekara ti beguna ungkup Sarawak tang sida milih malut penerang enggau ngaga pemutus enda nyukung RUU nya.

“Tauka sida bisi niat asal lebuh RUU nya dikemendar, sida takut orang luar enggai datai enggau betanding ba pengawa bepilih nengeri? Aku enda nemu, rayat deka ngaga pemutus,” ku iya nanya.

Ubah RUU nya dibantaika Menteri Dagang Temuai, Seni enggau Main Asal, Datuk Abdul Karim Rahman Hamzah enggau dikemendarka Speaker Dun Datuk Amar Mohd Asfia Awang Nassar sereta bulih sukung kabinet.

Ubah RUU tu dikena ngubah syarat taga umur nyadi Adun enggau nerang pasal takrif ‘peranak menua’ ngambi nyaga hak sereta pemaik nengeri ngambika orang ukai Sarawak enda masuk champur dalam pekara politik.

Suara Sarawak