KUCHING: Perintah Sabah mesti begulai enggau Perintah Sarawak ngetan satu pertiga pengari rayat ba Parlimen ke diatu bisi 222 penuduk.

Sapit Kepala Menteri Tan Sri James Jemut Masing madah, pengawa ngulihka penuduk nya beguna amat ngambika hak kededua nengeri ba Pulau Borneo ti ulih dijaga.

“Nya alai, aku besetuju enggau Kepala Menteri Datuk Patinggi Abang Johari Tun Openg ngambi ngulihka penuduk satu pertiga ba Parlimen.

“Sebedau Singapore ninggalka Malaysia ba taun 1965, penuduk Kaban Parlimen Semenanjung Malaysia nya kurang ari dua pertiga.

“Nya kebuah, Kaban Parlimen Malaysia nadai ulih ngubah Konstitusyen Perintah Besai enti nadai nerima sukung ari Kaban Parlimen Sarawak, Sabah enggau Singapore,” ku iya nerang, ditu kemari.

Taja pia, Masing ti mega Presiden Parti Rakyat Sarawak (PRS) madah, Singapore ti ninggalka Malaysia ba taun 1965 ngujungka semua 15 penuduk parlimen Singapore diempu Semenanjung Malaysia.

“Nadai siti penuduk pen diungkup ngagai Sarawak enggau Sabah,” terang Masing.

“Pekara tu deka ngeruga penuduk kitai enti sema semua Kaban Parlimen Semenanjung Malaysia deka ngubah Konstitusyen Perintah Besai laban bisi penuduk dua pertiga,” ku iya nerang.

Masing nyemetak madah, pekara tu deka meri pengerugi ngagai kededua nengeri Malaysia Timur.

“Parlimen Malaysia ulih ngemendar sebarang undang-undang ti tau ngeruga hak Sarawak enggau Sabah.

“Kebuah pia laban Kaban Parlimen Sarawak enggau Sabah kurang ari dua pertiga (ari semua 222 Kaban Parlimen),” tandu iya.