KUCHING: Sapit Premier Sarawak, Datuk Amar Douglas Uggah Embas ngelalau komuniti Kristian ba nengeri tu terus meri sukung rat ngagai Premier Sarawak Datuk Patinggi Tan Sri Abang Johari Tun Openg ti disebut nyadi tuai ungkup semua raban bansa dikena negut penyerakup pupu bansa enggau jalai pengarap sereta ngemansang Sarawak ti seati enggau lantang.
Nengah pesan Hari Krismas 2025 enggau Taun Baru 2026, Uggah madah ke peminta Abang Johari ngemudi nyadi pugu besai ngempung komuniti pupu bansa enggau jalai pengarap seraya nentuka Sarawak meruan likun sereta lantang lebuh nengeri tu nampung agenda pemansang bepuguka Strategi Pemansang Pengudah COVID 19 2030 (PCDS) 2030
. “Premier Sarawak nya tuai semua raban bansa, ngempung semua dikena nempa pengelantang pupu bansa enggau jalai pengarap lalu Sarawak ti seati.
“Nya kebuah, aku ngelalau semua raban orang Kristian ba Sarawak terus meri sukung rat ngagai iya nentuka Sarawak terus lantang enggau likun nipak visyen PCDS 2030,” ku iya.
Uggah mega madah, PCDS 2030 netapka kuing tuju nengeri nuju pengelantang ekonomi, bungkur sosial enggau pemeruan rampa menua lalu ngemerat peneguh komuniti ngambi nadai siku kena tinggal ari arus pemansang.
Iya mega bemalinka pengawa bejurai Bajet Sarawak 2026 ari Abang Johari kena 24 November tu tadi kelai pengeran perintah nengeri negap rayat enggau nentuka pengelantang ulih dikunsi sebela nyengkaum ba sitak menua pesisir.
Ku iya, agih belanja pemansang RM9.3 bilion dalam Bajet 2026 ke alai RM6.1 bilion tauka 66 peratus diagih ngagai pemansang menua pesisir nyeremin pengeran perintah ngedut takah pemansang sereta nambah pengelantang komuniti menua ulu.
Nambah ke nya, Uggah madah, perintah nengeri nerus sukung ngagai institusyen jalai pengarap nengah agih belanja RM120 juta ngagai Unit Pekara Pengarap Bukai (UNIFOR) ungkup taun 2026 kelimpah perintah meruan ngemerat pelajar, pemansang penau sereta inisiatif mutar ungkus pengidup.
Nutup pesan nya, Uggah meri Selamat Hari Krismas ngagai raban orang Kristian lalu ngelalau rayat Sarawak nyingkang ngagai taun 2026 enggau pengandal baru, penyerakup sereta tuju begulai nempa pemansang ti menyana agi ungkup semua.
