Sanitizer disadung ngagai rumah panjai di Meluan

JULAU: PPC Enterprise Sdn Bhd udah nyuaka Medical Grade Sanitizer ngagai Palan Servis Adun Meluan, ensanus.

Nengah sebengkah penerang ba ruai Facebook Rolland Duat Jubin ADUN N48 Meluan madahka iya empu ti udah nerima Medical Grade Sanitizer nya.

Duat madahka bantu 500 liter Medical Grade Sanitizer nya deka disadung ngagai rumah panjai ti bepekul maya pandemik Covid-19 di sitak Meluan.

“Pengawa sanitasyen nya ila deka dipejalai chara beripai enggau deka dipatau Palan Servis Adun Meluan.

“Aku meri besai terima kasih ngagai Menijar PPC Enterprise Sdn. Bhd, Ling Nai Woo laban udah manah ati nyaup kami nagang pengerekai igi penyakit Covid-19 tu.

“Sebedau tu, operasyen sanitasyen mega udah dipejalai ba berapa buah rumah panjai ti bepekul apin lama.

“Enggau peluang tu, aku meri besai terima kasih ngagai raban terabai komuniti ti bebendar gawa maya timpuh bepekul tu.

“Jasa enggau pemanah kita seruran dikenang belama lalu aku besampika kita gerai ngambi ulih nyaup kami nagang pandemik Covid-19,” ku Duat nerang.

Suara Sarawak