SAPA ngatur Gempuru Menua Sarawak, 28 April

KUCHING: Serakup Aspirasyen Rayat Sarawak (SAPA) deka ngatur Gempuru Menua Sarawak nagih Perintah Sarawak mantaika mosyen bejuraika Ubah Perkara 1(2) Konstitusyen Perintah Besai maya Dun ke deka datai.

Chairman Pengatur ke mega Ketuai Pemadah SAPA Peter John Jaban madahka gempuru nya dilanggur kena 28 April tu, urung pukul 4 lemai di Padang Merdeka ditu.

“Tuju bukai gempuru tu deka nagih status Sabah enggau Sarawak dipulai baka ti disempekat ba Sempekat Malaysia 1963 (MA63).

“Gempuru tu mega dikena ngansak Perkara 1 (2) Konstitusyen Perintah Besai dilangkar baru ngambi ngangkatka nengeri Borneo nyadi menua baka dalam taun 1963 nyentuk 1976.

“Bala Adun ari Gabungan Parti Sarawak (GPS) enggau Pakatan Harapan (PH) patut bejuraika isu tu ba Dun, ukai majak besalahka pangan diri nengah media,” ku iya rambau aum pengarang berita ditu, tadi.

Sama datai pemungkal SAPA ti mega Presiden Parti Reformasi Negeri Sarawak (Star) Lina Soo, Presiden SAPA Dominique Ng enggau Sekretari Pematau MA63 SAPA Alim Mideh.

Berindik ari nya, iya nesau rayat Sarawak nadai ngira penemu politik, bansa enggau pengarap sampal datai begempuru ngayanka peminta pekara besai nya dipejurai ba Dun.

Peter mega nyemetak madahka sida deka ngatur gempuru besai agi enti isu nya enda dibai enggau dipejurai dalam aum Dun ti ditimpuh berengkah ari 28 April tu.

NAGIH… (ari kanan) Soo, Peter, Ng enggau Alim nunjukka isi Konstitusyen Perintah Besai ti patut diubah enggau dipejurai maya Dun ti deka datai.