LUBOK ANTU: Sarang Bee Resort, siti palan ngelantang ati bepelasarka pemanah rampa menua sereta nyadi siti pematak temuai di pelilih tu.
Taja pen agi baru tang palan tu majak nerima perati sereta dikerindu pengusung lokal alai ngelantang ati enggau belepa begulai diri sebilik tauka bala bakih.
Bepalan enda jauh ari Batang Ai, Sarang Bee Resort nyendia gaya ti lantang lalu ai sungai ti chiru nyadi pematak besai ba endur nya.
Kelimpah ulih mandi enggau nyemerai, pengusung ulih muai penusut runding, belepa, jauh ari pengiruh mengeri, nimpai rampa menua gadung sereta ngedut pemanah kaul diri sebilik.
Ngemegahka agi, palan ngelantang ati tu bela mai segang ekonomi ngagai peranak lokal.
Pengempu Sarang Bee, Helmmy Bunyam, 37, madah, pengawa numbuh palan nya mujur ngerandang peluang ngagai pedaja nyual pemakai, rumah temuai enggau deriba bot.
“Sarang Bee ukai semina palan ngelantang ati aja tang nyadi ruang komuniti lokal nyungkak penatai pemisi,” ku iya.
Tampung iya, dagang temuai bepelasarka pemanah rampa menua kelebih agi di Lubok Antu endang nyukung ekonomi peranak lokal.
Terang iya, pekara nya ulih dipeda nengah aktiviti ekodagang temuai enggau pengawa nemuai ke rumah panjai.
Pia mega, ku iya, Sarang Bee Resort meri peluang ngagai peranak lokal nyual pemakai, krafjari sereta nyendia servis rekreasyen ngagai pengusung.
Nangkan nya, pedagang madu kelulut ba palan ngelantang ati nya, Norina Bunyam, 45, pechaya pemansang infrastruktur dagang temuai ti benung diperambu dia dekameri empas positif ngagai genturung nya.
“Enti palan tu chakah dikelaku lalu fasiliti ditu ditegap, tentu mayuh temuai deka datai kitu kelimpah ngeranchakka agi ekonomi lokal,” ku iya.
Nengah sukung betampung ari perintah enggau kerejasama ari komuniti, Sarang Bee Resort bisi pengulih nyadi penyungkak ngagai pemansang dagang temuai menua pesisir di Lubok Antu.
Penatai palan ngelantang ati nya mandang palan ti mit ulih mai reti ti besai ngagai pengelantang enggau pemansang komuniti. – FN
