KUCHING: Sarawak napi penyuntuk 45 peratus katil sepital enggau 54 peratus lutur enti dibanding standard katil enggau lutur di selampur Malaysia.

Sapit Premier Sarawak, Datuk Amar Dr. Sim Kui Hian madah, Sarawak diatu sedia napi pemar besai ba sektor pengerai berindik ari suntuk pengereja pengawa perubat enggau infrastruktur sepital ti meruan.

“Kitai enda minta lebih ari nengeri bukai, tang abis nadai kitai deka seikas enggau Semenanjung Malaysia,” ku iya.

Dr. Sim bejaku munyi nya lebuh ngemata pengawa nyain Sempekat Pemereti Ati (MOU) entara Sarawak Energy Berhad enggau Roche Malaysia, di Sepital Besai Sarawak (SGH), ditu tadi.

Ku iya, ba pengawa mutarka isu tu, Perintah Sarawak udah nganjung peminta ngulihka mayuh agi autonomi ba sektor pengerai nengah Sempekat Malaysia 1963 (MA63).