KUCHING: Perintah Sarawak terus negap pemansang nembiak enggau lumba lebuh ngagihka geran sepenyampau RM1.93 juta ngagai 43 gerempung enggau serakup ngemujur aktiviti besai sereta besikap napi Lumba SEA 2027.
Menteri Nembiak, Lumba enggau Pemansang Orang Dagang Sarawak, Datuk Seri Abdul Karim Rahman Hamzah madah, inisiatif nya mandang komitmen perintah nengeri negap ekosistem nembiak enggau lumba.
Ku iya, geran sepenyampau RM1,934,600 nya diagih ngagai 43 gerempung enggau serakup ngaul lima gerempung nembiak sereta 38 organisasyen lumba ba selampur Sarawak.
“Geran tu ukai semina bantu belanja aja tang lambang pengandal perintah ngagai nembiak enggau komuniti lumba ngambi terus regas, progresif sereta meri empas positif ngagai komuniti,” ku iya.
Karim madah munyi nya serimbai Pengawa Nyua Geran Nembiak enggau Lumba 2026 di Hotel Waterfront Kuching, malam kemari.
Menteri Dagang Temuai, Industri Kreatif enggau Seni Pemerindang nya madah, bantu nya dikearap ulih nyadi penyungkak gerempung nya dikena nambah kualiti kelimpah ngatur program ti inklusif enggau besemekih agi.
Ba pekara sama, iya madah ke Sarawak diatu ransing besikap nyadi tuai pengatur ungkup sekeda lumba serimbai Lumba SEA 2027.
Ku iya, bisi 17 lumba deka diatur ba nengeri tu enggau mayuh inisiatif nyeruri perengkaguna enggau fasiliti lumba benung dipejalai nentuka pengawa besikap lanchar.
“Bisi 11 projek pemansang beungkus urung RM277 juta benung dipejalai ba Kuching, nyengkaum nyeruri Stadium Sarawak ti deka nyadi palan ngatur pengerami lumba tebilang nya,” terang iya. – EDISI UKAS
