KUCHING: Sarawak patut nempa bala pakar lokal ba bidang metalurgi, sains enggau teknologi ngmabi unsur nadi bumi tauka ‘rare earth element’ (REE) ulih diinjin sereta diberi rega tambah ba nengeri tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ngembuan pengelandik ba teknologi nginjin beguna endar dikena nentuka pengulih pun pemansut REE ulih dikena manah enggau enda ditatak nyadi pengeluar kereban mata aja.

“Tang kitai meseti bisi pakar, nya kebuah modal mensia kitai meseti sedia lalu kitai meseti bisi pengatur pun pemansut kitai, saintis sumber kitai meseti bisi.

“Enti nadai, kitai enda ulih nambah rega laban kitai enda nemu (chara nya).

Ambi ke chunto magnet, baka ni deka ngaga magnet?

“Lumur dua ke disebut aku tadi, ‘Gallium Nitride’ mega REE tang meseti bisi chara nginjin lalu kitai meseti belajar bekaul pengawa nya,” ku iya lebuh dirandau pemberita pengudah Pengerami Bejadi AI For Makers: Borneo Makers Festival 2026 di TEGAS Digital Village, ditu Hari Minggu.

Iya madah baru, bidang metalurgi nyadi entara penemu pakar ke patut diberi perati laban nya bekaul enggau pengawa nginjin logam enggau kereban mata ke bisi di Sarawak.

Ku iya, landik ba penemu enggau teknologi dalam bidang nya deka ngasuh Sarawak ulih nambahka rega tambah pun pemansut, nyengkaum kereban ke bisi pengulih dikena ba pemansang teknologi moden.

Datuk Patinggi Abang Zohari mega nyemetak madah ke pemesai guna nempa mayuh agi saintis enggau pemansik lokal dikena ngerembaika penemu enggau bejalaika tungkap bekaul pun pemansut nengeri.

Ku iya, Sarawak ngembuan mayuh pun pemansut ke tau dikemansang, tang penau modal mensia nyadi pekara beguna dikena nentuka pun pemansut nya ulih diserungkai enggau dikena semua.

“Kitai di Sarawak tu, enti ulih, saintis ke ulih meri penemu tu, ngembuan Ijazah Doktor Falsafah (PhD) bekaul subjek Iaban tu bisi kaul enggau pun pemansut kitai,” ku iya. — EDISI UKAS