KUCHING: Pemutus Gardenia numbuh kilang keterubah ba Sarawak kelai nyata nengeri tu majak nerima perati kompeni tikas antarabansa nyadi palan strategik dikemansang, ku Sapit Premier Sarawak, Datuk Amar Dr. Sim Kui Hian.
Ku iya, nya diperansang pengandal pemeranak puku ngagai pengelebih pengereja pengawa menua ti bekualiti, ekosistem dagang ti lantang, penegap nengeri sereta kualiti idup ti majak nambah.
“Lebuh kompeni baka Gardenia milih Sarawak, tu nunjukka pemeranak puku lebuh nengeri tu bisi semua atur dikena nyukung pemansang industri berega.
“Kitai deka mayuh agi kompeni antarabansa nunda singkang Gardenia.
“Sida ukai datai aja laban peluang dagang, tang laban andal ke pengereja pengawa kitai, sistem pelajar, fasiliti pengerai, gaya idup enggau tunga kuing pemansang nengeri tu,” ku iya.
Dr. Sim nyebut jaku nya ba aum pemberita pengudah ngemata Pengawa Nyain Sempekat Pemereti Ati (MoU) entara Kim Teck Cheong Consolidated Berhad (KTC), anak kompeni Gardenia enggau Sanjung Etika Sdn Bhd, anak kompeni enggi Yayasan Sarawak enggau Perintah Sarawak dikena numbuh anak kompeni enggi Gardenia Bakeries (Sarawak) Sdn Bhd.
MoU nya disain Direktor Pengatur Pengawa Gerup Kim Teck Cheong Consolidated Berhad, Datuk Lau Kok Sing enggau Direktor Sanjung Etika Sdn Bhd, Datuk Hatta Solhi ba pengawa ti diatur ba siti hotel tebilang, ditu ensanus sereta digulu Direktor Yayasan Sarawak, Datu Mohamad Junaidi Mohidin enggau Direktor Eksekutif KTC, Datuk Dexter Lau.
Ku Dr.Sim, kompeni global diatu nadai agi ngaga pemutus meranak puku bepelasarka ungkus operasyen aja, tang mega berati ke pengelebih sesebengkah nengeri nyendia modal mensia bekualiti, fasiliti pengerai moden, pelajar tikas antarabansa sereta kualiti idup ti ulih matak enggau ngetan penau pemadu manah.
Nya kebuah, iya meri terima kasih ngagai Kim Teck Cheong, kompeni ruang bilik ti diatu datai ba serak ketiga lalu beumur manggai 90 taun laban milih meranak puku di Sarawak sereta nyendia peluang gawa ngagai rayat nengeri tu.
Ku iya, pengawa numbuh kilang Gardenia di Sarawak nentuka penguna menua bisi bekal ruti ti digaga ba nengeri tu empu lalu negap rentayan bekal pemakai enggau ngeranchakka agi sektor kilang menua.
Kelimpah ari nya, ku iya, produk Gardenia ari Sarawak deka mandangka identiti kediri ngena tungkus khas bechura kuning, mirah enggau chelum, bebida ari tungkus biru ti dikena ba Semenanjung Malaysia lalu mandangka penyelai makit nengeri tu.
