SERIAN: Sarawak meseti negap semua rentayan sektor agropemakai ari pemansut nyentuk nginjin enggau ngelaku dikena ngamat juluk nyadi pengeksport pemakai beresi manggai 2030 nipak Strategi Pemansang Pengudah COVID-19 (PCDS) 2030.
Menteri Industri Pemakai, Komoditi enggau Pemansang Kandang Menua, Datuk Seri Dr Stephen Rundi Utom madah, pengawa ngatur Agrofest ukai semina nyadi pelasar dikena ngelakuka asil betanam betupi menua, tang mega nyadi chara dikena ngelala produk premium tetiap kandang endur sereta negap ekosistem industri agropemakai nengeri.
“Taja pen selinting nyadi pengeksport pemakai beresi dipeda bisi pemar, tang juluk nya ulih dijapai nyema perintah, ejensi sereta pemekuh industri meri perati ngagai pemansang sistem pemansut, ekosistem sereta rentayan bekal ti tegap enggau meruan agi.
“Pekara dikemerat kitai iya nya nyamin pengelikun bekal pemakai seraya nambah penatai pemisi rayat kelebih agi pekebun enggau orang bumai di menua pesisir.
“Kitai deka meda ubah nyengala ba penatai pemisi ruang bilik raban orang bumai, ukai semina mengkang ngena chara lama,” ku iya lebuh bejadi Agrofest Serian 2026 ba Palan Konvensyen Serian (SCC) ditu, kemari.
Bela datai, Sapit Menteri Industri Pemakai, Komoditi enggau Pemansang Kandang Menua Sarawak, Datuk Martin Ben enggau Datuk Dr Abdul Rahman Ismail; Sapit Menteri Pengangkut Sarawak (Langit enggau Darat), Datuk Dr Jerip Susil sereta bala temuai dipebasa bukai.
Nangkan nya, ku Rundi, taja pen Bank Dunya udah ngaku Sarawak nyadi kandang menua bepenatai pemisi tinggi kenyau ari taun 2022, tang agi tubah peranak menua pesisir apin ngasai ke pemaik nya.
Nya kebuah, ku iya, opis menteri diatu meri perati ngagai pemansang industri pemakai, komoditi enggau rentayan rega ti genap nyerangkung sektor ulu, tengah enggau ili dikena nentuka asil betanam betupi berega.
Ku iya, pengelemi sebedau tu iya nya mansutka asil betanam betupi ti nadai disukung makit enggau industri nginjin ti entap ngujungka mayuh asil betugung enda dijual maya musin ngarang buah.
“Buah bemusin baka rian, sibau enggau langsat patut digaga nyadi produk bukai nentuka rega nya ulih ditambah lalu entap agi.
“Ungkup utai tanam ti bebuah sepemanjai taun baka buah berunai, pisang enggau inyak, kitai mega begunaka industri nginjin ti ulih nyamin makit ngagai bala pekebun,” ku iya.
Berebak enggau nya, ngingatka Opis Betanam Betupi nentuka tetiap program pemansang, nyengkaum AgriCOP dipejalai bepelasarka endur ti engkeman, pengulih pekebun enggau peminta makit lalu ukai semina meransang pengawa betanam lalu nadai jamin makit endur ngelaku ke asil nya.
Rundi mega netapka selinting penatai pemisi tiap ruang bilik orang bumai nyapai abis nadai RM15,000 sebulan manggai taun 2030, nengah sektor betanam betupi chara moden.
Ku iya, runding tauka peragam ti ngumbai pengawa betanam betupi nya pengawa ti tusah, kamah sereta kurang mansutka asil patut diubah nengah pengawa ngena teknologi moden baka pengawa betanam pintar, Internet of Things (IoT), fertigasyen, rumah gadung, betanam chara silik (precision farming) enggau automasyen.
“Rebak biak patut meda sektor betanam betupi nyadi bidang ti ulih nambah pengaya, ukai semina pengawa begaji tetap.
“Tanah ti dikembuan kitai nya reta ti ulih nambah penatai pemisi enti dikemansang ngena teknologi enggau chara pemadu manah,” ku iya nyemetak. – RUSNAN MUSTAFA
