KUCHING: Pengawa Bepilih Besai (PRU) Sarawak Ke-13 udah ditetapka kena 12 Disember tu, lalu hari ngantung nama chalun ditetap kena 28 November.
Chairman Komiti Besai Pengawa Bepilih (SPR) Malaysia, Datuk Sri Ramlan Harun madah, pemutus nya dijapai berindik ari aum khas ti diatur SPR sehari tu tadi pengudah Kunsil Negeri (DUN) Sarawak Ke-19 dipadam kena 26 Oktober tu tadi.
Ramlan madah, SPR mega udah netapka 8 Disember nya hari ngundi tumu, lalu writ pengawa bepilih udah dipansut sehari tu mega.
“Bekaul enggau nya, SPR ngatur aum khas sehari tu, 6 November 2026, lalu mutuska PRU Sarawak Ke-13 deka diatur dikena ngisi penuduk ba Kunsil Nengeri,” ku iya.
Berebak enggau nya, iya madahka peminta undi pos ba semua kategori nyengkaum ungkup sida ti diau ba menua tu enggau menua luar udah dibuka kenyau ari 26 Oktober.
Ramlan madah baru, peminta ungkup kategori 1B (peranak Malaysia ti diau di menua luar) enggau kategori 1C (ngaul ejensi tauka gerempung) deka ditutup kena 20 November tu.
“Peminta ungkup kategori 1A ti mungkur pemesai pengawa bepilih, staf SPR, raban polis, soldadu sereta media deka ditutup kena 25 November,” ku iya.
Iya mega madah, dikena nentuka pejalai pengawa bepilih lanchar, SPR udah nyiri 82 iku Pegawai Pengurus Pengawa Bepilih, ti deka disaup 305 iku Sapit Pegawai Pengurus.
