KUCHING: Sarawak nyelinting pansut ari perekuh penatai pemisi jelen lalu nguing ngagai ekonomi berega tinggi ti disungkak inovasyen teknologi, pansik enggau pemansang penau.
Premier Sarawak, Datuk Patinggi Tan Sri Abang Johari Tun Openg madahka tikas penatai pemisi mengkang jelen nyema ekonomi agi bepangai ba aktiviti masang produk dibanding pemansang enggau nengekang teknologi moden.
“Nya kebuah, Sarawak bejalaika chara bebida enggau nempa pemun ungkup ekonomi ti maju agi dikena nguing ngagai aktiviti berega tinggi lalu besemekih ba renggat antarabansa,” ku iya.
Abang Johari madah munyi nya lebuh Pengerami Gempung Parti Sarawak (GPS) Backbenchers Night di Hotel Sheraton, ditu malam kemari.
Iya madahka nengeri tu meseti ngelui ari pangku pengawa nyadi penguna, tang mansang ke mua lalu nyadi penengekambang teknologi.
“Kitai enda ulih terus mengkang nyadi penguna. Kitai meseti ngemansang penau diri empu lalu nyadi penengekambang teknologi enti ulih nguing nuju tikas pemansang ekonomi ti tinggi agi,” ku iya.
Ba pekara sama, iya nyemetak madahka timpuh lima taun ke deka datai ba renggat pemansang kritikal ungkup Sarawak ngamatka juluk nya.
“Kitai meseti bejalaika chara baru sereta polisi ti nemban dikena nyukung transfomasyen nya,” terang iya.
Abang Johari nyemetak madahka pemesai guna matak pengawa meranak puku antarabansa dikena ngerumban pemansang ekonomi nengeri.
“Pemeranak puku terus betemu enggau kami ngambi mereti ke polisi pemansang Sarawak nengah Strategi Pemansang Pengudah COVID-19 (PCDS) 2030,” ku iya.
Nya nyengkaum diligit ari Abu Dhabi kelimpah randau enggau kompeni teknologi global, SoftBank bekaul pengulih meranak puku di Sarawak.
“Pengerindu nya mandangka peluang ti disedia di Sarawak taja pen penerang enggau status perambu meranak puku nya bepangai ngagai pekara baru ila,” ku iya. – ZAHID ZAKI
