SERAKUP Besai Kuntau Sarawak (SKF) udah nempa siti da pemujur ngelaku pesaka seni ngentaka diri Sarawak ba pangau antarabangsa nengah Pekit Seni Ngentaka Diri Antarabangsa (IMAC) 2026 ti diatur World Martial Arts Union (WoMAU) di Chungju, Korea Selatan.

Diligit ari 22 pemekit nya udah ngesan tanggungpengawa ngari ke Malaysia enggau temegah ati, mandangka bemacham seni ngentaka diri ari komuniti Melayu, Iban enggau Bidayuh di Sarawak.

Diligit SKF mandangka tiga tradisyen seni ngentaka diri ti nyelai nya iya nya Kuntau Melayu (Silat Seni Asli Zamrud dan Mayang Mengurai), Bisi mega Kuntau Iban (Spring Kipas dan Spring 24 Propeller Bilun Kiruh) enggau Kutow Bidayuh (Kutow Rusat Rimoung).

Seni ngentaka diri tu mandangka bemacham identiti budaya, penemu asal, falsafah sereta tradisyen bekuntau komuniti di Sarawak.

Nya kebuah, pemujur ba pekit tu mandangka pesaka nyelai nengeri tu enggau semangat beserakup pupu bansa.

Tim seni ngentaka diri Bidayuh ari SKF udah mujur bulih penuduk keempat ba kategori Beraban Ngena Senyata (Weapons Duo), bepadan enggau pengari ari 10 menua sereta nerima perai mata duit sepenyampau KRW 250,000.

SKF mega nerima Anugerah Basa berega KRW 400,000 ngujungka semua perais ti diterima sepenyampau KRW 650,000.

Nambah ke nya, SKF mandangka pengeran nyaga, ngemansang enggau ngelaku seni ngentaka diri Kuntau sereta seni ngentaka diri peranak asal nyadi elemen beguna ba identiti budaya enggau pesaka enda nyengala Sarawak.

World Martial Arts Union (WoMAU), ti beribu opis di Chungju, Korea Selatan nya siti organisasyen antarabangsa ti keran nyaga enggau ngelaku seni ngentaka diri ba serata dunya.

Rentayan antarabangsa raban bsi nya nyerangkung urung 41 menua enggau lebih ari 60 organisasyen seni ngentaka diri ti menang besilih budaya, bekunsi enggau kerajasama antarabangsa, nyengkaum inisiatif ti setkap enggau tuju pesaka budaya enda nyengala UNESCO.

IMAC 2026 udah matak pemekit ari 13 menua ti bepekit ba tujuh kategori besai.

Tu nyengkaum kategori Individu Nadai Ngena Senyata (Lelaki enggau Indu), Individu Ngena Senyata (Lelaki enggau Indu), Beraban Nadai Ngena Senyata enggau Pemerindang Beraban.

Pekit nya ngaku penyulut ngembuan lebih mudil emas, pirak enggau engkeraju, setipit sereta perais mata duit seraya anugerah khas ti ngemari sukat populariti, pengelantang, pengelikun enggau kaul bebekih.

Ngenang pemujur nya, Chairman SKF, Datuk Abang Ariffin berasai temegah ngagai diligit Malaysia sereta anugerah antarabangsa ti diterima.

“Pengawa kami bepekit ba IMAC 2026 ukai semina menang pekit tauka nerima anugerah.

“Tang tu kebendar chara mai Sarawak enggau Malaysia ngagai tikas antarabangsa seraya nyaga sereta bekenaka pesaka seni ngentaka diri ari kitai enggau dunya,” terang iya.

“Kami mega temegah laban diligit udah mandangka seni ngentaka diri ari komuniti Melayu, Iban enggau Bidayuh ke pangau dunya.

“Tradisyen tu mandangka bemacham pengaya budaya di Sarawak ari komuniti bebida, bekunsi pengeransing sebaka dikena nyaga pesaka asal sida,” ku iya.

Iya ngaku seni ngentaka diri nya jara idup ungkup sejarah, pemintar, disiplin, falsafah enggau identiti budaya kita.

“Kitai meseti nyaga tradisyen tu, dokumentasyen asal sereta nentuka pesaka nya ditampung rebak dudi,” ku iya.

Samnil pechaya, Sarawak bisi pengulih ti chukup besai nyadi palan antarabangsa ungkup seni ngentaka diri asal, pesaka budaya, pelajar enggau dagang temuai.

“Nengah kerejasama enggau WoMAU sereta bank antarabangsa, kami ngarap ulih mayuh agi peluang ungkup rebak dudi kitai.

“Seni ngentaka diri meseti ngemung semua mensia, ngelui bida peranak, etnik, pengarap enggau budaya. Tu mih semangat Pengerup Puku Bansa,” ku iya nyemetak.

Abang Ariffin ngar ke SKF meri besai terima kasih ngagai Perintah Sarawak, bala tuai menua sereta institusyen penyukung ke pengeransang, penganjai enggau pengadang sida ngagai inisiatif SKF dikena nyaga enggau ngelaku seni ngentaka diri ba renggat antarabangsa.

“Terima kasih mega nuju ke tabupuji ngagai semua diligit ti ngambi bagi ngari ke tradisyen seni ngentaka diri Melayu, Iban enggau Bidayuh ke pengeransang, disiplin, semangat beraban enggau pengeransing ti dibantai.

“SKF mega meri terima kasih ngagai WoMAU, Komiti Pengatur IMAC 2026 sereta peranak Chungju, Korea Selatan laban bebedar ngelaku seni ngentaka diri ba tikas antarabangsa,” ku iya.

Kelimpah ari nya, SKF deka nanggam kerejasama WoMAU, inisiatif pesaka budaya ti bekaul enggau UNESCO sereta organisasyen seni ngentaka diri antarabangsa dikena ngemujur inisiatif nyaga seni ngentaka diri, pelajar, pemansang nembiak, besilih budaya enggau dagang temuai pesaka. – FAIZAL BUJANG