“Tu rumah kitai, nya kebuah kitai ngaga rumah tu nentuka peranak semampai idup likun enggau lantang. Kitai ngarapka semua panjai umur ngambi ulih meda semua pemansang ti deka diasai ke nengeri tu ila.”
KUCHING: Premier Sarawak, Datuk Patinggi Tan Sri Abang Johari Tun Openg agi beentelah bekaul haribulan madahka Kunsil Nengeri (DUN) ngambi meri awak bejalaika Pengawa Bepilih Nengeri (PRN) ke-13.
Ku Abang Johari, iya empu apin nemu haribulan DUN Sarawak dipadam, taja pen mayuh peragam bekaul haribulan nya ngerembai.
“Nyentuk diatu, aku pen enda nemu kemaya haribulan DUN dipadam. Taja pia, timpuh endang nyentuk Februari 2027,” ku iya.
Abang Johari madah munyi nya ba Pengerami Gempung Parti Sarawak (GPS) Backbenchers Night di Hotel Sheraton, ditu malam kemari.
Berebak enggau nya, iya meri jamin pengawa ngemansang Sarawak terus dikemerat Perintah GPS ke pemaik rebak dudi.
Iya ti mega Chairman GPS madahka Sarawak nya rumah ngagai tetiap peranak.
“Tu rumah kitai, nya kebuah kitai ngaga rumah tu nentuka peranak semampai idup likun enggau lantang.
“Kitai ngarapka semua panjai umur ngambi ulih meda semua pemansang ti deka diasai ke nengeri tu ila,” ku iya.
Nangkan nya, Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah sebedau tu ngadang PRN Ke-13 bulan Disember tu.
PRN Sarawak kepenudi diatur kena 18 Disember 2021, ngemata GPS menang besai pengudah menang 76 ari 82 penuduk. – ZAHID ZAKI
