KUCHING: Naka bulan September 2026, Sarawak ngerikodka penatai pemisi penyampau RM10.732 bilion tauka 82 peratus ari selinting penatai pemisi dalam taun tu.
Premier Sarawak, Datuk Patinggi Tan Sri Abang Johari Tun Openg madah, penatai pemisi nya datai ari tiga batang pemansut iya nya Chukai Jual Nengeri penyampau RM3.941 bilion, pampas mata duit nganti hak minyak enggau gas penyampau RM2.334 bilion enggau dividen RM2.147 bilion.
“Chukai jual nengeri tebal agi datai ari produk petroleum enggau minyak sawit mata.
“Bepelasarka gaya diatu, Sarawak naga penyampau penatai pemisi dalam taun 2026 manggai RM13.571 bilion, iya nya nambah RM552 juta tauka empat peratus enti dibanding enggau taga asal iya nya RM13.049 bilion” ku iya.
Abang Johari bejaku lebuh mantaika Bajet 2027 rambau Aum Kedua Penggal Kelima Kunsil Nengeri (DUN) Sarawak ba Kompleks DUN ditu, pagi tadi.
Ku iya, tambah selinting nya tebal agi datai ari pengawa nisih baru Geran Khas ari Perintah Besai iya nya ari RM600 juta ngagai RM1.5 bilion berengkah taun tu.
“Pengawa mansik baru pekara nya bisi nambah RM900 juta enti dibandingka enggau penyampau Geran Khas ti diperambu sebedau tu,” terang iya.
