Saspek ditangkap ngamang bini ngena duku

MIRI: Siku lelaki ke nadai batang pengawa tetap ari Jalai Pujut Padang Kerbau ditan polis dikena mantu pansik bekaul enggau dawa ngamang bini iya enggau duku 59cm pemanjai kena lemai Hari Enam tu tadi.

Tuai Polis Pelilih Miri Asisten Komisioner Hakemal Hawari ngenukuka saspek, 35, ditangkap urung pukul 8.40 malam ensana.

Penusah nyadi urung pukul 6.30 lemai, pengudah saspek minta tinchun emas enggau duit dalam sebuah rumah di Jalai Pujut Padang Kerbau tang peminta nya enda diturutka bini iya ke beumur 31 taun.

Ringat meda bini iya enda meri dia saspek terus ngambi duku lalu ngamang duku nya ngagai rekung bini iya.

Saspek mega madah diri deka mantap bini iya nyema enggai nitihka peminta iya.

Insiden nya taja pia mujur dirara indai saspek ti bela bisi ba rumah nya.

Beduduk ari nangika pengelikun diri, bini saspek terus ngaga ripot polis ba Balai Polis Central Miri.

Kes dipansik nitihka Seksyen 506 Kanun Keseksaan ketegal penyalah ngamang.

Suara Sarawak