SIBU: Mensia mayuh ti deka neresa zon ke Kapit mesti dulu peresa chulit Covid-19 enggau pemutus mesti negatif sebedau bulih permit ari polis.

Nya Atur Pengawa Standard (SOP) baru ti dikeluarka Komiti Penyangga Penusah Ngenyit Bagi Menua Kapit (JPBBK) nengah Opis Residen Kapit kemari (Hari Lima) berengkah 27 April nyentukka 10 Mei tu.

Pejalai atur tu digaga dikena nyekat pejalai entara bagi menua kelebih agi ke Kapit dalam nagang pengerekai penyakit Covid-19.

JPBBK mega ngandalka pejalai atur keluar tauka tama ari Bagi Menua Kapit nya mungkur Pelilih Memua Song, Kapit, Bukit Mabong enggau Belaga.

“Peresa rT-PCR enggau RTK ungkup Covid-19 ulih digaga ba Klinik Pengerai Kapit di Jalai Bletih lalu tiap peresa dichaj RM290 lalu deka dibayar sida empu,” ku komiti nya seraya madahka pemutus peresa semina sah dikena pengelama 96 jam aja.

Penerang nya madahka, bagi pejalai ba dalam pelilih menua Kapit enda ibuh begunaka pemutus peresa chulit taja pia permit polis agi diguna.

Polis deka ngempang jalai alun di mayuh palan strategik ba sepemanjai Jalai Kapit-Song-Kanowit-Sibu enggau Jalai Belaga-Bakun.

Ungkup kes ngenyit baka pengawa ribat kaban belayan dampih enggau berubat, peminta mesti bulih pemendar khas ari Klinik Pengerai Kapit ngambika status sida ulih ditukuka.

Pengudah bulih pemendar enggau setuju ari Klinik Pengerai Kapit, peminta deka minta permit polis enggau pengawa nya semina ulih diguna sepengelama 72 jam aja.

Berebak enggau nya, pejalai perengka pengangkut ti dirintaika dalam servis beguna baka ngangkut barang pemakai mega dipinta bejalaika peresa rT-PCR enggau RTK sereta ngulihka pemutus peresa negatif Covid-19.

Ku penerang Opis Residen Kapit nya agi, asil negatif peresa deka ulih dikena sepemanjai timpuh pengawa ngangkut barang ke bagi menua nya.

Kelimpah ari nya, Opis Residen Kapit mega madahka berengkah 27 April tu semua premis pemakai di bagi menua nya semina deka dikemendarka nyual pemakai bungkus pulai aja sereta nadai pengawa makai ba kedai (dine-in).