SEBUYAU: Sapit Menteri Besai, Datuk Seri Ahmad Zahid Hamidi meri jamin deka mantu numbuhka balai bomba ba sitak Sebuyau.

Iya madah deka mantaika pekara nya ngagai Menteri Pemansang Perintah Lokal, Ng Kor Ming laban nya chukup diguna ba pelilih nya.

“Enda ngawa mit dulu laban pekara pemadu beguna pelilih tu bisi lori ti ngundan ai laban kitai enggai sitak Sebuyau enggau ngelingi tu nyadi raban tasah angus.

“Aku enggai lebuh bomba datai lalu ripot media madahka bomba mujur ngerara api ba timpuh tiga minit tang pejalai sida ngelawa palan tu manggai tiga jam,” ku iya.

Zahid mansutka jaku nya rambau Program Ngaul Rayat ba Balai Tebuka Sekula Priamri (SK) Haji Bujang Sebangan ditu, kemari.

Iya ti mega Menteri Pemansang Menua Pesisir enggau Wilayah madahka diri deka chakah minta Indu Opis Polis Pelilih (IPD) ditumbuh ba Sebuyau.

“Ba runding aku, ukai balai polis tang IPD ti diguna ba sitak tu laban Sebuyau udah diaku nyadi pelilih penuh,” ku iya.