KUCHING: Semua staf Perintah Sarawak diperansang nyikap diri ngemujurka Langgur Pemansang Malaysia Lumpar Ke-13 (RMK-13).

Sekretari Perintah Sarawak, Datuk Amar Mohamad Abu Bakar Marzuki madah, semua staf enda tau enda nentuka servis perintah dipejalai enggau efisyen, engkeman enggau responsif.

Ku iya, budaya gawa baka nya beguna endar ngambi tetangkupka servis ti diguna rayat kemaya hari.

“Baka ti bisi ba RMK13, chara bejalai ke polisi enggau projek pemansang meseti inklusif, holistik enggau meruan.

“Reti nya, nyadi staf perintah, kitai enggai nyadi terus ngemeran chara lama enggau kelalu bepanggai ba chara nya,” ku iya ba Jaku Lalau Bulan Ogos, ensanus.

Abu Bakar madah, pejalai prinsip 3R iya nya Revisit (Berati Baru), Rethink (Berunding Baru), Recharge (Berubah) besai reti nentuka sistem servis perintah mengkang efisyen, engkeman sereta responsif nipak guna kemaya hari.

Prinsip keterubah ti ngaul Revisit ku iya, meri perati ngagai pemesai guna berati ke baru pengelemi ke bisi.

“Engka bisi proses kereja ti ngasuh pejalai projek laun tauka lubah dipejalai.”

“Prinsip Rethink ngasuh kitai berundingka chara baru ti engkeman dikena kemaya hari tu.”

“Engka chara tauka proses dikena diatu engkeman ba 20 taun ti udah, tang nyau enda engkeman diatu, kelebih agi ba konteks ekonomi global bepelasarka digitalisasyen,” ku iya nerang.

Nya alai ku Abu Bakar, staf Perintah Sarawak meseti seruran berubah ngambi setipak enggau jukuk Premier Sarawak, Datuk Patinggi Tan Sri Abang Johari Tun Openg.

“Staf Perintah Sarawak, meseti sikar enggau meras gawa baka Premier Sarawak.

“Kitai enda tau tinggal jauh.

Enti iya nyingkang ngena gear lima, kitai enda tau ba gear tiga. “Kitai meseti sama nyingkang ngambi juluk nempa Sarawak nyadi kandang menua ti mansang enggau bepenatai pemisi tinggi manggai 2030 ulih dijapai,” ku iya.